maut aur ishq

dīda-e-aflāk ne dekhe bahut inqilāb

ahd-e-kuhan ke nishāñ mahv hue misl-e-ḳhvāb

ek fareb-e-nazar vahm-e-sukūn-o-sabāt

ziist hai ik mustaqil kashmakash-e-iztirāb

jin kī nigāhoñ se thī shorish-e-bazm-e-jahāñ

maut kī āġhosh meñ aaj haiñ vo mahv-e-ḳhvāb

jin kī bulandī se thī rif.at-e-gardūñ ḳhajil

haiñ vo ravāq-e-buland aaj tabāh-o-ḳharāb

vaqt ke har naqsh kā maut hī anjām hai

haiñ isī qānūn meñ jakḌe hue shaiḳh-o-shāb

maut ke be-rahm haath chhīn liyā tū ne aah

kitne saroñ kā uruuj kitne diloñ kā sabāt

nesh-e-ajal se magar un ko nahīñ kuchh gazand

ishq kī lazzat se haiñ jin ke jigar kāmyāb

jin kī nigāhoñ meñ hai ishq kā sirr-e-nihāñ

ishq hai asl-e-kamāl ishq hai ain-e-sabāt

kyā hai ajal parda-e-hastī ke uThne kā naam

ishq uThā detā hai pahle hī se ye hijāb

maut se hotī hai duur ruuh kī ālūdgī

ishq se paatī hai ruuh aur sivā āb-o-tāb

maut milā detī hai zarre ko ḳhurshīd se

ishq banā detā hai zarra hī ko āftāb

un ke liye maut ik hosh kā paiġhām hai

zindagī musta.ār jin kī hai mānind-e-ḳhvāb

ruuh agar pahle hī ishq se bedār ho

be-asar us ke liye maut ho yā inqilāb

dida-e-aflak ne dekhe bahut inqilab

ahd-e-kuhan ke nishan mahw hue misl-e-KHwab

ek fareb-e-nazar wahm-e-sukun-o-sabaat

zist hai ek mustaqil kashmakash-e-iztirab

jin ki nigahon se thi shorish-e-bazm-e-jahan

maut ki aaghosh mein aaj hain wo mahw-e-KHwab

jin ki bulandi se thi rifat-e-gardun KHajil

hain wo rawaq-e-buland aaj tabah-o-KHarab

waqt ke har naqsh ka maut hi anjam hai

hain isi qanun mein jakDe hue shaiKH-o-shab

maut ke be-rahm hath chhin liya tu ne aah

kitne saron ka uruj kitne dilon ka sabaat

nesh-e-ajal se magar un ko nahin kuchh gazand

ishq ki lazzat se hain jin ke jigar kaamyab

jin ki nigahon mein hai ishq ka sirr-e-nihan

ishq hai asl-e-kamal ishq hai ain-e-sabaat

kya hai ajal parda-e-hasti ke uThne ka nam

ishq uTha deta hai pahle hi se ye hijab

maut se hoti hai dur ruh ki aaludgi

ishq se pati hai ruh aur siwa aab-o-tab

maut mila deti hai zarre ko KHurshid se

ishq bana deta hai zarra hi ko aaftab

un ke liye maut ek hosh ka paigham hai

zindagi mustaar jin ki hai manind-e-KHwab

ruh agar pahle hi ishq se bedar ho

be-asar us ke liye maut ho ya inqilab