maut dil se lipaT gai us shab

ek ḳhvāb-e-hazīmat duniyā

ek aahaT davām ḳhvāhish kī

ek joḌī qadīm hāthoñ kī

aur āñkhoñ ke band farġhul meñ

ek ḳhvāhish hamesha rahne kī

ek bistar purānī yādoñ kā

aur soyā huā dil-e-vahshī

āhanī uñgliyoñ ke panje meñ

ik ghanī tīrgī ke raste meñ

zā.iqa bhūlī-bisrī bārish kā

ek saaya jhukā huā dil par

der tak āsmāñ se girtī huī

ek maddham sadā darīchoñ meñ

ek pur-shor sail kī āvāz

saañs kī silvaTeñ Dubotī huī

kaun thā is samay ke āñgan meñ

jāgtī raat ko thapaktā huā

kaun thā rāt-din ke phere meñ

ga.ī duniyāoñ se ubhartā huā

ro rahā thā dayār-e-ġhurbat meñ

aur mādūm ke ilāqe meñ

apnī āñkhoñ meñ Daal kar miTTī

ḳhvāb taktā huā maiñ bachpan ke

ek hañste hue guzishta meñ

ek KHwab-e-hazimat duniya

ek aahaT dawam KHwahish ki

ek joDi qadim hathon ki

aur aankhon ke band farghul mein

ek KHwahish hamesha rahne ki

ek bistar purani yaadon ka

aur soya hua dil-e-wahshi

aahani ungliyon ke panje mein

ek ghani tirgi ke raste mein

zaiqa bhuli-bisri barish ka

ek saya jhuka hua dil par

der tak aasman se girti hui

ek maddham sada darichon mein

ek pur-shor sail ki aawaz

sans ki silwaTen Duboti hui

kaun tha is samay ke aangan mein

jagti raat ko thapakta hua

kaun tha raat-din ke phere mein

gai duniyaon se ubharta hua

ro raha tha dayar-e-ghurbat mein

aur madum ke ilaqe mein

apni aankhon mein Dal kar miTTi

KHwab takta hua main bachpan ke

ek hanste hue guzishta mein