maut

kaun āvāra havāoñ kā subuk-bār hujūm

aah ehsās kī zanjīr garāñ TuuT ga.ī

aur sarmāya-e-anfās pareshāñ na rahā

mere siine meñ ulajhne lagī fariyād mirī

phir nigāhoñ pe umañD aayā hai tārīk dhuāñ

TimTimānā hai mire saath ye māyūs charāġh

aaj miltā nahīñ afsos patañgoñ kā nishāñ

mere siine meñ ulajhne lagī fariyād mirī

TuuT kar rah ga.ī anfās kī zanjīr-e-girāñ

toḌ Dālegā ye kambaḳht makāñ kī dīvār

aur maiñ dab ke isī Dher meñ rah jā.ūñgā

jī ulajhtā hai mirī jaan pe ban jā.egī

thak gayā aaj shikārī kī kamāñ TuuT ga.ī

lauT aayā huuñ bahut duur se ḳhālī hāthoñ

aaj ummīd kā din biit gayā shaam huī

maiñ ne chāhā bhī magar tum se mohabbat na huī

ki chuke ab to ḳhudā ke liye ḳhāmosh raho

ek mauhūm sī ḳhvāhish thī falak chhūne kī

zañg-ālūd mohabbat ko tujhe sauñp diyā

sard hāthoñ se mirī jaan mire hoñT na sī

gar kabhī lauT ke aa jaa.e vahī sāñvlī raat

ḳhushk āñkhoñ meñ jhalak aa.e na be-sūd namī

zalzala uf ye dhamākā ye musalsal dastak

be-amāñ raat kabhī ḳhatm bhī hogī ki nahīñ

uf ye maġhmūm fazāoñ kā alamnāk sukūt

mere siine meñ dabī jaatī hai āvāz mirī

tīrgī uf ye dhuñdlakā mire nazdīk na aa

ye mire haath pe jaltī huī kyā chiiz girī

aaj is ashk-e-nadāmat kā koī mol nahīñ

aah ehsās kī zanjīr-e-girāñ TuuT ga.ī

aur ye merī mohabbat bhī tujhe jo hai aziiz

kal ye maazī ke ghane bojh meñ dab jā.egī

kaun aayā hai zarā ek nazar dekh to lo

kyā ḳhabar vaqt dabe paañv chalā aayā ho

zalzala uf ye dhamākā ye musalsal dastak

khaTkhaTātā hai koī der se darvāze ko

uf ye maġhmūm fazāoñ kā alamnāk sukūt

kaun aayā hai zarā ek nazar dekh to lo

toḌ Dālegā ye kambaḳht makāñ kī dīvār

aur maiñ dab ke isī Dher meñ rah jā.ūñgā

kaun aawara hawaon ka subuk-bar hujum

aah ehsas ki zanjir garan TuT gai

aur sarmaya-e-anfas pareshan na raha

mere sine mein ulajhne lagi fariyaad meri

phir nigahon pe umanD aaya hai tarik dhuan

TimTimana hai mere sath ye mayus charagh

aaj milta nahin afsos patangon ka nishan

mere sine mein ulajhne lagi fariyaad meri

TuT kar rah gai anfas ki zanjir-e-giran

toD Dalega ye kambaKHt makan ki diwar

aur main dab ke isi Dher mein rah jaunga

ji ulajhta hai meri jaan pe ban jaegi

thak gaya aaj shikari ki kaman TuT gai

lauT aaya hun bahut dur se KHali hathon

aaj ummid ka din bit gaya sham hui

main ne chaha bhi magar tum se mohabbat na hui

ki chuke ab to KHuda ke liye KHamosh raho

ek mauhum si KHwahish thi falak chhune ki

zang-alud mohabbat ko tujhe saunp diya

sard hathon se meri jaan mere honT na si

gar kabhi lauT ke aa jae wahi sanwli raat

KHushk aankhon mein jhalak aae na be-sud nami

zalzala uf ye dhamaka ye musalsal dastak

be-aman raat kabhi KHatm bhi hogi ki nahin

uf ye maghmum fazaon ka alamnak sukut

mere sine mein dabi jati hai aawaz meri

tirgi uf ye dhundlaka mere nazdik na aa

ye mere hath pe jalti hui kya chiz giri

aaj is ashk-e-nadamat ka koi mol nahin

aah ehsas ki zanjir-e-giran TuT gai

aur ye meri mohabbat bhi tujhe jo hai aziz

kal ye mazi ke ghane bojh mein dab jaegi

kaun aaya hai zara ek nazar dekh to lo

kya KHabar waqt dabe panw chala aaya ho

zalzala uf ye dhamaka ye musalsal dastak

khaTkhaTata hai koi der se darwaze ko

uf ye maghmum fazaon ka alamnak sukut

kaun aaya hai zara ek nazar dekh to lo

toD Dalega ye kambaKHt makan ki diwar

aur main dab ke isi Dher mein rah jaunga