maut

ufuq-e-zīst se ik aur sitāra TuuTā

ik kiran aur huī raat kī zulmat meñ asiir

phir kisī naġhma-e-betāb kī lai saaz se āzād huī

ek tābinda haqīqat ki jo thī raaz huī

sard paimān-e-vafā sard huī ātish-e-shauq

sard jazbāt kā tūfān ḳhamosh

sard tābinda nigāhoñ ke sharār

sard-bar-kaifiyat-e-ġham kī sulagtī huī aag

jaam pur-shor se gir jaane do nākām tamannāoñ kī mai

farsh-e-mai-ḳhāna-e-ulfat pe ulaT do sāġhar

sar-nigūñ band darīchoñ meñ ummīdoñ ke diye gul kar do

dāstāñ soz-o-mohabbat kī adhūrī hai

magar

alamiya ḳhatm huā

dil-shikan āḳhirī manzar pe girā do parde

ufuq-e-zist se ek aur sitara TuTa

ek kiran aur hui raat ki zulmat mein asir

phir kisi naghma-e-betab ki lai saz se aazad hui

ek tabinda haqiqat ki jo thi raaz hui

sard paiman-e-wafa sard hui aatish-e-shauq

sard jazbaat ka tufan KHamosh

sard tabinda nigahon ke sharar

sard-bar-kaifiyat-e-gham ki sulagti hui aag

jam pur-shor se gir jaane do nakaam tamannaon ki mai

farsh-e-mai-KHana-e-ulfat pe ulaT do saghar

sar-nigun band darichon mein ummidon ke diye gul kar do

dastan soz-o-mohabbat ki adhuri hai

magar

alamiya KHatm hua

dil-shikan aaKHiri manzar pe gira do parde