mazdur

gard chehre par pasīne meñ jabīñ Duubī huī

āñsuoñ meñ kuhniyoñ tak āstīñ Duubī huī

piiTh par nāqābil-e-bardāsht ik bār-e-garāñ

zo.af se larzī huī saare badan kī jhurriyāñ

haDDiyoñ meñ tez chalne se chaTaḳhne kī sadā

dard meñ Duubī huī majrūh Taḳhne kī sadā

paañv miTTī kī tahoñ meñ mel se chikTe hue

ek badbū-dār mailā chīthaḌā bāñdhe hue

jā rahā hai jānvar kī tarah ghabrātā huā

hāñptā girtā laraztā Thokareñ khātā huā

muzmahil vāmāñdgī se aur fāqoñ se niDhāl

chaar paise kī tavaqqo.a saare kumbe kā ḳhayāl

apne ham-jinsoñ kī be-mehrī se māyūs-o-malūl

safha-e-hastī par ik satr-e-ġhalat harf-e-fuzūl

apnī ḳhilqat ko gunāhoñ kī sazā samjhe hue

aadmī hone ko la.anat aur balā samjhe hue

zindagī ko nāgavār ik sāneha jaane hue

bazm-e-kibr-o-nāz meñ farz apnā pahchāne hue

rāste meñ rāhgīroñ kī nazar se be-niyāz

shorish-e-mātam se naġhmoñ ke asar se be-niyāz

us ke dil tak zindagī kī raushnī jaatī nahīñ

bhuul kar bhī us ke hoñToñ par hañsī aatī nahīñ

ek lamha bhī nahīñ fikr-e-ma.īshat se najāt

sub.h ho yā shaam hai tārīk us kī kā.enāt

dekh ai qārūn-e-āzam dekh ai sarmāya-dār

nā-murādī kā muraqqa.a be-kasī kā shāhkār

go hai terī hī tarah insāñ magar maqhūr hai

dekh ai daulat ke andhe saañp ye mazdūr hai

gard chehre par pasine mein jabin Dubi hui

aansuon mein kuhniyon tak aastin Dubi hui

piTh par naqabil-e-bardasht ek bar-e-garan

zoaf se larzi hui sare badan ki jhurriyan

haDDiyon mein tez chalne se chaTaKHne ki sada

dard mein Dubi hui majruh TaKHne ki sada

panw miTTi ki tahon mein mel se chikTe hue

ek badbu-dar maila chithaDa bandhe hue

ja raha hai jaanwar ki tarah ghabraata hua

hanpta girta larazta Thokaren khata hua

muzmahil wamandgi se aur faqon se niDhaal

chaar paise ki tawaqqoa sare kumbe ka KHayal

apne ham-jinson ki be-mehri se mayus-o-malul

safha-e-hasti par ek satr-e-ghalat harf-e-fuzul

apni KHilqat ko gunahon ki saza samjhe hue

aadmi hone ko lanat aur bala samjhe hue

zindagi ko nagawar ek saneha jaane hue

bazm-e-kibr-o-naz mein farz apna pahchane hue

raste mein rahgiron ki nazar se be-niyaz

shorish-e-matam se naghmon ke asar se be-niyaz

us ke dil tak zindagi ki raushni jati nahin

bhul kar bhi us ke honTon par hansi aati nahin

ek lamha bhi nahin fikr-e-maishat se najat

subh ho ya sham hai tarik us ki kaenat

dekh ai qarun-e-azam dekh ai sarmaya-dar

na-muradi ka muraqqa be-kasi ka shahkar

go hai teri hi tarah insan magar maqhur hai

dekh ai daulat ke andhe sanp ye mazdur hai