mazdur ki zindagi

dopahar kā vaqt garmā kī havā.eñ tez-tar

mehr kī tābish se pighle jā rahe haiñ dasht-o-dar

garm hai nahroñ kā paanī sard hai nabz-e-bahār

ḳhushk patte jeb-o-dāman kar rahe haiñ tārtār

jal rahā hai sabza-e-be-rañg farsh-e-ḳhāk par

bhun rahā hai dhuup kī tezī se getī kā jigar

tund jhoñke aa rahe haiñ dāman-e-kohsār se

sar-zamīn-e-rañg-o-bū par aag barsāte hue

jānvar sab maare maare phir rahe haiñ khet meñ

jaise koī karvaTeñ letā ho taptī ret meñ

haa.e vo mazdūr jis ke paa.e himmat par nisār

sañg-dil sarmāya-dārī kā sar-e-nā-pā.edār

jis ke bal-būte pe itrātī hai lailā-e-zamīñ

jis kī haibat se laraz jaatā hai charḳh-e-ambarīñ

Dūbtī nabzoñ meñ dauḌātā hai jo ḳhūn-e-hayāt

jis ke dam se jagmagā uThtī hai bazm-e-kā.enāt

jis kī nazroñ se chamaktā hai tamaddun kā shabāb

sar-nigūñ hai jis ke aage ahd-e-nau kā āftāb

ho nahīñ saktā ki vo ārām le din ko kabhī

kufr hai maz.hab meñ us ke kāhilī kī zindagī

zindagī kyā maut se Dartā nahīñ mard-e-hazīñ

phir bhī is duniyā meñ koī pūchhne vaalā nahīñ

aaj bhī hai is balā kī dhuup meñ masrūf-e-kār

go mahall-e-aish meñ bad-mast hai sarmāya-dār

kyā khaḌā taktā hai sūrat ahd-e-hāzir ke javāñ

haañ miTā de dushman-e-insāf kā nām-o-nishāñ

dopahar ka waqt garma ki hawaen tez-tar

mehr ki tabish se pighle ja rahe hain dasht-o-dar

garm hai nahron ka pani sard hai nabz-e-bahaar

KHushk patte jeb-o-daman kar rahe hain tartar

jal raha hai sabza-e-be-rang farsh-e-KHak par

bhun raha hai dhup ki tezi se geti ka jigar

tund jhonke aa rahe hain daman-e-kohsar se

sar-zamin-e-rang-o-bu par aag barsate hue

jaanwar sab mare mare phir rahe hain khet mein

jaise koi karwaTen leta ho tapti ret mein

hae wo mazdur jis ke pae himmat par nisar

sang-dil sarmaya-dari ka sar-e-na-paedar

jis ke bal-bute pe itraati hai laila-e-zamin

jis ki haibat se laraz jata hai charKH-e-ambarin

Dubti nabzon mein dauData hai jo KHun-e-hayat

jis ke dam se jagmaga uThti hai bazm-e-kaenat

jis ki nazron se chamakta hai tamaddun ka shabab

sar-nigun hai jis ke aage ahd-e-nau ka aaftab

ho nahin sakta ki wo aaram le din ko kabhi

kufr hai mazhab mein us ke kahili ki zindagi

zindagi kya maut se Darta nahin mard-e-hazin

phir bhi is duniya mein koi puchhne wala nahin

aaj bhi hai is bala ki dhup mein masruf-e-kar

go mahall-e-aish mein bad-mast hai sarmaya-dar

kya khaDa takta hai surat ahd-e-hazir ke jawan

han miTa de dushman-e-insaf ka nam-o-nishan