saza

har baar mere sāmne aatī rahī ho tum

har baar tum se mil ke bichhaḌtā rahā huuñ maiñ

tum kaun ho ye ḳhud bhī nahīñ jāntī ho tum

maiñ kaun huuñ ye ḳhud bhī nahīñ jāntā huuñ maiñ

tum mujh ko jaan kar hī paḌī ho azaab meñ

aur is tarah ḳhud apnī sazā ban gayā huuñ maiñ

tum jis zamīn par ho maiñ us kā ḳhudā nahīñ

pas sar-ba-sar aziyyat o āzār hī raho

bezār ho ga.ī ho bahut zindagī se tum

jab bas meñ kuchh nahīñ hai to bezār hī raho

tum ko yahāñ ke saaya o partav se kyā ġharaz

tum apne haq meñ biich kī dīvār hī raho

maiñ ibtidā-e-ishq se be-mehr hī rahā

tum intihā-e-ishq kā me.aar hī raho

tum ḳhuun thūktī ho ye sun kar ḳhushī huī

is rañg is adā meñ bhī purkār hī raho

maiñ ne ye kab kahā thā mohabbat meñ hai najāt

maiñ ne ye kab kahā thā vafādār hī raho

apnī matā-e-nāz luTā kar mire liye

bāzār-e-iltifāt meñ nādār hī raho

jab maiñ tumheñ nashāt-e-mohabbat na de sakā

ġham meñ kabhī sukūn-e-rifāqat na de sakā

jab mere sab charāġh-e-tamannā havā ke haiñ

jab mere saare ḳhvāb kisī bevafā ke haiñ

phir mujh ko chāhne kā tumheñ koī haq nahīñ

tanhā karāhne kā tumheñ koī haq nahīñ

har bar mere samne aati rahi ho tum

har bar tum se mil ke bichhaDta raha hun main

tum kaun ho ye KHud bhi nahin jaanti ho tum

main kaun hun ye KHud bhi nahin jaanta hun main

tum mujh ko jaan kar hi paDi ho azab mein

aur is tarah KHud apni saza ban gaya hun main

tum jis zamin par ho main us ka KHuda nahin

pas sar-ba-sar aziyyat o aazar hi raho

bezar ho gai ho bahut zindagi se tum

jab bas mein kuchh nahin hai to bezar hi raho

tum ko yahan ke saya o partaw se kya gharaz

tum apne haq mein bich ki diwar hi raho

main ibtida-e-ishq se be-mehr hi raha

tum intiha-e-ishq ka mear hi raho

tum KHun thukti ho ye sun kar KHushi hui

is rang is ada mein bhi purkar hi raho

main ne ye kab kaha tha mohabbat mein hai najat

main ne ye kab kaha tha wafadar hi raho

apni mata-e-naz luTa kar mere liye

bazar-e-iltifat mein nadar hi raho

jab main tumhein nashat-e-mohabbat na de saka

gham mein kabhi sukun-e-rifaqat na de saka

jab mere sab charagh-e-tamanna hawa ke hain

jab mere sare KHwab kisi bewafa ke hain

phir mujh ko chahne ka tumhein koi haq nahin

tanha karahne ka tumhein koi haq nahin