mehman-dari

phailī hai fazāoñ meñ ḳhushī merī nazar kī

hañstī nazar aatī haiñ fazā.eñ mire ghar kī

dil-shād mire ahl-o-ayāl aaj bahut haiñ

masrūf haiñ vo bhī nahīñ masrūf faqat maiñ

rakhī hai salīqe se har ik kaam kī chiiz aaj

mehmān mire ghar meñ haiñ kuchh mere aziiz aaj

shādī kā makāñ ghar mirā ma.alūm na ho kyuuñ

majma.a ho jab itnā to bhalā dhuum na ho kyuuñ

bhaa.ī bhī haiñ bahnoī bhī bhāvaj bhī bahan bhī

baiThā hai bhatījā bhī bhatīje kī dulhan bhī

bachchī idhar ik baiTh ke taktī hai dulhan ko

kuchh tifl satāte haiñ udhar apnī bahan ko

bachchoñ pe jhalak ḳhaas hai tanvīr-e-sahar kī

uTh baiThe haiñ sab sunte hī āvāz gajar kī

dilkash ye fazā sub.h kī ye nuur kā taḌkā

bulbul kī tarah bol rahā hai koī laḌkā

be-vaj.h koī rone pe āmāda huā hai

hairat se na.e gur ko koī dekh rahā hai

baiThā hai ye chup dauḌ rahā hai vo ḳhushī se

khāne ke liye zid koī kartā hai abhī se

karnā hai jo sāmān-e-ziyāfat ko farāham

aa aa ke mire kaan meñ kuchh kahtī haiñ begam

honā hai jo ḳhūbī se ziyāfat kā sar-anjām

laḌkī ke zariye se bhī pahuñchātī haiñ paiġhām

aatī bhī haiñ jaatī bhī haiñ begam sū-e-matbaḳh

māmāoñ meñ be-vaqt jahāñ hotī hai chaḳh chaḳh

rāhat na mile kyuuñ unheñ halkī tag-o-dau meñ

saa.e kī tarah saath hai laḌkī bhī jilau meñ

nannhī abhī uTThī nahīñ pahlū se phuphī ke

letī haiñ vo rah rah ke maze us kī hañsī ke

laḌke mire ḳhush ho ke udhar dekh rahe haiñ

iḳhlās-o-mohabbat se muḳhātib huuñ jidhar maiñ

majma.a ye azīzoñ kā mohabbat kī ye bāteñ

in pyaar kī bātoñ meñ na choTeñ haiñ na ghāteñ

anvār tabassum ke takallum se haiñ paidā

zau sub.h kī is manzar-e-dil-kash pe hai shaidā

bātoñ kā abhī thā tarabī silsila jaarī

nargis ne kahā aa ke hai tayyār nahārī

phaili hai fazaon mein KHushi meri nazar ki

hansti nazar aati hain fazaen mere ghar ki

dil-shad mere ahl-o-ayal aaj bahut hain

masruf hain wo bhi nahin masruf faqat main

rakhi hai saliqe se har ek kaam ki chiz aaj

mehman mere ghar mein hain kuchh mere aziz aaj

shadi ka makan ghar mera malum na ho kyun

majma ho jab itna to bhala dhum na ho kyun

bhai bhi hain bahnoi bhi bhawaj bhi bahan bhi

baiTha hai bhatija bhi bhatije ki dulhan bhi

bachchi idhar ek baiTh ke takti hai dulhan ko

kuchh tifl satate hain udhar apni bahan ko

bachchon pe jhalak KHas hai tanwir-e-sahar ki

uTh baiThe hain sab sunte hi aawaz gajar ki

dilkash ye faza subh ki ye nur ka taDka

bulbul ki tarah bol raha hai koi laDka

be-wajh koi rone pe aamada hua hai

hairat se nae gur ko koi dekh raha hai

baiTha hai ye chup dauD raha hai wo KHushi se

khane ke liye zid koi karta hai abhi se

karna hai jo saman-e-ziyafat ko faraham

aa aa ke mere kan mein kuchh kahti hain begam

hona hai jo KHubi se ziyafat ka sar-anjam

laDki ke zariye se bhi pahunchati hain paigham

aati bhi hain jati bhi hain begam su-e-matbaKH

mamaon mein be-waqt jahan hoti hai chaKH chaKH

rahat na mile kyun unhen halki tag-o-dau mein

sae ki tarah sath hai laDki bhi jilau mein

nannhi abhi uTThi nahin pahlu se phuphi ke

leti hain wo rah rah ke maze us ki hansi ke

laDke mere KHush ho ke udhar dekh rahe hain

iKHlas-o-mohabbat se muKHatib hun jidhar main

majma ye azizon ka mohabbat ki ye baaten

in pyar ki baaton mein na choTen hain na ghaten

anwar tabassum ke takallum se hain paida

zau subh ki is manzar-e-dil-kash pe hai shaida

baaton ka abhi tha tarabi silsila jari

nargis ne kaha aa ke hai tayyar nahaari