mera bap

khulī fazā meñ saaf havā ke jaisā vo

bārish ke paanī ke jaisā vo

gahrā thā miTTī se rishta pairoñ kā

us rishte ke biich na aa.ī chappal bhī

ghaḌī na bāñdhī kabhī kalā.ī par us ne

sūraj-tāre vaqt use batlāte the

apne bal par apnī dhun meñ rahtā thā

nahīñ kisī se gaañv meñ vo Dartā thā

naam kī ḳhvāhish thī na use pahchān kī thī

bas apne kāmoñ se matlab rakhtā thā

vo daana thā vo miTTī thā

vo paudā thā vo mausam thā

vo sachchā ḳhālis insān thā

jaise aadam aur havvā the

vo tanhā thā

ek baḌe se ghar meñ tanhā rahtā thā

bhaiñseñ us ke saath thiiñ

us kī baat samajhtī thiiñ

vo bhī un kī hī bhāshā meñ un se bāteñ kartā thā

ghar par aksar lagā ke taalā yūñhī sā

khaliyānoñ meñ rahne vaalā baap mirā

khetoñ khetoñ basne vaalā baap mirā

aam kī chhāñv meñ sone vaalā baap mirā

ab miTTī meñ sotā hai

aam ke peḌ kī ḳhushk jaḌoñ meñ rotā hai

khuli faza mein saf hawa ke jaisa wo

barish ke pani ke jaisa wo

gahra tha miTTi se rishta pairon ka

us rishte ke bich na aai chappal bhi

ghaDi na bandhi kabhi kalai par us ne

suraj-tare waqt use batlate the

apne bal par apni dhun mein rahta tha

nahin kisi se ganw mein wo Darta tha

nam ki KHwahish thi na use pahchan ki thi

bas apne kaamon se matlab rakhta tha

wo dana tha wo miTTi tha

wo pauda tha wo mausam tha

wo sachcha KHalis insan tha

jaise aadam aur hawwa the

wo tanha tha

ek baDe se ghar mein tanha rahta tha

bhainsen us ke sath thin

us ki baat samajhti thin

wo bhi un ki hi bhasha mein un se baaten karta tha

ghar par aksar laga ke tala yunhi sa

khaliyanon mein rahne wala bap mera

kheton kheton basne wala bap mera

aam ki chhanw mein sone wala bap mera

ab miTTi mein sota hai

aam ke peD ki KHushk jaDon mein rota hai