mera dost abul-haul

dhuāñ-dhār taqrīr jis ne abhī kī thī vo aadmī hai

jo lafzoñ ke pul bāñdhtā hai

ubharte hue nau-javānoñ ko va.adoñ kī afyūn de kar

usī pul pe laatā hai aur ġharq kar ke

palaT jaatā hai hasb-e-dastūr ārām-gah ko

ye duniyā to un shola sāmān logoñ ne aapas meñ taqsīm kar lī

jo hathiyār kī shakl meñ ranj-o-ġham Dhālte haiñ

yā gola-bārūd ke kār-ḳhānoñ ke mālik haiñ

yā phir sanā-ḳhvāñ haiñ un ke

hamāre liye sirf naare bache haiñ

san.atī daur ke kaj-kulāhoñ kī dād-o-dahish rūh-parvar ho yā jān-levā

magar zindābād, āfrīñ, marhabā, ke sivā kuchh nahīñ paas apne

ye sab jāntā hai hamārī shujā.at kī parvāz kyā hai

hamārī javāñ-mardī ik sūba-jātī ta.assub se

yā firqa-vārī fasādāt se aage kuchh bhī nahīñ hai

futūhāt-e-askandarī ham ne taḳhtī pe likh kar miTā dī haiñ kab kī

hamāre ba.ad zamīñ ke tale so rahe haiñ

ajā.ib-gharoñ meñ laTaktī haiñ talvāreñ un kī

aur un ke zarrīñ libādoñ ko ghun khā gayā hai

zira-baktaroñ par clones aa ga.ī hai

ye sab jāntā hai hamārī tag-o-tāz kyā hai

hamāre shikam gar hamāre suroñ pe na hote

aur chehroñ meñ āzā-e-jinsī

to ham achchhe insān bante

hamāre gharoñ ke kam o besh sab aqabī darvāze paiham khule haiñ

hamāre lahū meñ hare laal piile bahut saare parcham khule haiñ

kahīñ se magar haq kī āvāz aatī nahīñ hai

hamārī zabāñ dil kī sāthī nahīñ hai

hamāre liye khokhlā lafz-e-jamhūriyat hai, taqārīr haiñ leaderoñ kī

hamāre liye roz-nāmoñ ke safhāt haiñ, ishtihārāt haiñ nīm-jinsī

hamāre liye devtāoñ ke but haiñ, ḳhudā ke farāmīn haiñ aur uqbā

jo bad-rañg hai haal kī tarah aur kore laTThe kī bū se bharī hai

hamāre liye sirf roTī kī jidd-o-johd

auratoñ ke barhana badan kī tamannā se aage kahīñ kuchh nahīñ hai

hamārī ragoñ meñ jo tezāb hai us kī shiddat kabhī kam na hogī!

dhuan-dhaar taqrir jis ne abhi ki thi wo aadmi hai

jo lafzon ke pul bandhta hai

ubharte hue nau-jawanon ko wadon ki afyun de kar

usi pul pe lata hai aur gharq kar ke

palaT jata hai hasb-e-dastur aaram-gah ko

ye duniya to un shola saman logon ne aapas mein taqsim kar li

jo hathiyar ki shakl mein ranj-o-gham Dhaalte hain

ya gola-barud ke kar-KHanon ke malik hain

ya phir sana-KHwan hain un ke

hamare liye sirf nare bache hain

sanati daur ke kaj-kulahon ki dad-o-dahish ruh-parwar ho ya jaan-lewa

magar zindabaad, aafrin, marhaba, ke siwa kuchh nahin pas apne

ye sab jaanta hai hamari shujaat ki parwaz kya hai

hamari jawan-mardi ek suba-jati tassub se

ya firqa-wari fasadat se aage kuchh bhi nahin hai

futuhat-e-askandari hum ne taKHti pe likh kar miTa di hain kab ki

hamare baad zamin ke tale so rahe hain

ajaib-gharon mein laTakti hain talwaren un ki

aur un ke zarrin libaadon ko ghun kha gaya hai

zira-baktaron par clones aa gai hai

ye sab jaanta hai hamari tag-o-taz kya hai

hamare shikam gar hamare suron pe na hote

aur chehron mein aaza-e-jinsi

to hum achchhe insan bante

hamare gharon ke kam o besh sab aqabi darwaze paiham khule hain

hamare lahu mein hare lal pile bahut sare parcham khule hain

kahin se magar haq ki aawaz aati nahin hai

hamari zaban dil ki sathi nahin hai

hamare liye khokhla lafz-e-jamhuriyat hai, taqarir hain leaderon ki

hamare liye roz-namon ke safhat hain, ishtihaaraat hain nim-jinsi

hamare liye dewtaon ke but hain, KHuda ke faramin hain aur uqba

jo bad-rang hai haal ki tarah aur kore laTThe ki bu se bhari hai

hamare liye sirf roTi ki jidd-o-johd

auraton ke barhana badan ki tamanna se aage kahin kuchh nahin hai

hamari ragon mein jo tezab hai us ki shiddat kabhi kam na hogi!