mera ghussa kahan hai?

maiñ āsmān ke saath phailī shaam kī nāranjī raushnī huuñ

yā sūraj kī aañkh meñ reñgtī surḳh dhār?

kyā hai merā vajūd?

yaum-e-īd qurbān hotī bheḌoñ kā sabr

yā hīroñ ke ta.āqub meñ ko.elā ko.elā phirtī ḳhvāhish?

maiñ sarmā meñ abābīloñ kī murjhā.ī ruuh huuñ

yā sarmast daraḳhtoñ kī choTiyoñ meñ mad.hosh havā?

haañ...... maiñ raat kī jhilmilātī raushniyoñ ke pīchhe

uljhī ālūda shikan huuñ

bachcha jantī maañ kī āḳhirī chīḳh merī mohabbat hai

maiñ rāh-gīroñ kī lā-parvāh ḳhushī meñ

sahmā ḳhauf huuñ

maiñ gautam ke muskurāte ruḳhsāroñ kā lams huuñ

sātveñ āsmān par ġhota-zan parinde

agar merī pur-sukūn ruuh meñ parvāz karte haiñ

to phir ye kaisā bojh hai

jo tumhāre chhoḌ jaane ke ba.ad

is ġhubār-ālūd siine meñ jamne lagā hai?

lekin merā ġhussa kis sher ke badan meñ jharjharātā hai?

merī aag kis uqaab kī āñkhoñ meñ kapkapātī hai?

jise tumhārī hañsī tumhāre makkār dil

aur tumhārī dhoke-bāz naaf meñ uñDel sakūñ!

main aasman ke sath phaili sham ki naranji raushni hun

ya suraj ki aankh mein rengti surKH dhaar?

kya hai mera wajud?

yaum-e-id qurban hoti bheDon ka sabr

ya hiron ke taaqub mein koela koela phirti KHwahish?

main sarma mein ababilon ki murjhai ruh hun

ya sarmast daraKHton ki choTiyon mein madhosh hawa?

han main raat ki jhilmilati raushniyon ke pichhe

uljhi aaluda shikan hun

bachcha janti man ki aaKHiri chiKH meri mohabbat hai

main rah-giron ki la-parwah KHushi mein

sahma KHauf hun

main gautam ke muskuraate ruKHsaron ka lams hun

satwen aasman par ghota-zan parinde

agar meri pur-sukun ruh mein parwaz karte hain

to phir ye kaisa bojh hai

jo tumhaare chhoD jaane ke baad

is ghubar-alud sine mein jamne laga hai?

lekin mera ghussa kis sher ke badan mein jharjharaata hai?

meri aag kis uqab ki aankhon mein kapkapati hai?

jise tumhaari hansi tumhaare makkar dil

aur tumhaari dhoke-baz naf mein unDel sakun!