mera hindostan

ye hai merā vatan merā hindostāñ

ya.anī ḳhush-rañg phūloñ kā ik gulistāñ

phuul aise bhī khilte rahe haiñ yahāñ

jin kī ḳhushbū se mahkā hai saarā jahāñ

ye hai merā vatan merā hindostāñ

chishtī-o-nānak-o-gautam-o-rām kī

sab ko mālūm hai sar-zamīñ thī yahī

jin se ta.alīm insāniyat kī milī

jism hai is kī miTTī meñ sab kā nihāl

ye hai merā vatan merā hindostāñ

hai ye gāñdhī kā jauhar kā pyārā vatan

kar ga.e is pe qurbān jo jān-o-tan

is ko qudrat ne baḳhshī haiñ gañg-o-jaman

misl-e-amrit ke hai jin kā āb-e-ravāñ

ye hai merā vatan merā hindostāñ

us ke dushman haiñ 'sāhil' pas-o-pesh meñ

jaa.eñ kis raah se aur kis bhes meñ

hai himāla sā parbat mire desh meñ

qaul-e-iqbāl meñ santarī pāsbāñ

ye hai merā vatan merā hindostāñ

ye hai mera watan mera hindostan

yani KHush-rang phulon ka ek gulistan

phul aise bhi khilte rahe hain yahan

jin ki KHushbu se mahka hai sara jahan

ye hai mera watan mera hindostan

chishti-o-nanak-o-gautam-o-ram ki

sab ko malum hai sar-zamin thi yahi

jin se talim insaniyat ki mili

jism hai is ki miTTi mein sab ka nihaal

ye hai mera watan mera hindostan

hai ye gandhi ka jauhar ka pyara watan

kar gae is pe qurban jo jaan-o-tan

is ko qudrat ne baKHshi hain gang-o-jaman

misl-e-amrit ke hai jin ka aab-e-rawan

ye hai mera watan mera hindostan

us ke dushman hain 'sahil' pas-o-pesh mein

jaen kis rah se aur kis bhes mein

hai himala sa parbat mere desh mein

qaul-e-iqbaal mein santari pasban

ye hai mera watan mera hindostan