mera nazriya-e-sher

sher kyā hai husn kī har ek shai meñ justujū

ik nigār-e-husn se parde ke pīchhe guftugū

ik umīd-e-sub.h nūrānī añdherī raat meñ

mehr-e-tābinda kā jalva sīna-e-zarrāt meñ

ārzū-e-bahr kā qatre ke dil meñ irti.āsh

ik ham-āhangī kī fitrat mazāhir meñ talāsh

parda-e-har-lafz meñ poshīda ma.anī kā shu.ūr

be-niyāz-e-jām-o-sāġhar ek rūhānī surūr

ye latāfat mādde kā baar uThā saktī nahīñ

sher kī ismat havas kī taab lā saktī nahīñ

sher kya hai husn ki har ek shai mein justuju

ek nigar-e-husn se parde ke pichhe guftugu

ek umid-e-subh nurani andheri raat mein

mehr-e-tabinda ka jalwa sina-e-zarraat mein

aarzu-e-bahr ka qatre ke dil mein irtiash

ek ham-ahangi ki fitrat mazahir mein talash

parda-e-har-lafz mein poshida mani ka shuur

be-niyaz-e-jam-o-saghar ek ruhani surur

ye latafat madde ka bar uTha sakti nahin

sher ki ismat hawas ki tab la sakti nahin