mera watan

gautam hue ki nānak kaakī hue ki chishtī

loadī hue ki tuġhlaq sayyad hue ki ḳhiljī

aa aa ke jis meñ un kī miltī ga.ī hai miTTī

nā-ittifāqiyoñ ne jis par girā.ī bijlī

merā vatan vahī hai merā vatan vahī hai

ūñche pahāḌ jis ke the rāstoñ ko roke

dushman ko jis ke dariyā laate the par Dubo ke

ilm-o-hunar kī daulat jis ne luTā.ī so ke

bachche gadā haiñ jis ke sab apnā maal kho ke

merā vatan vahī hai merā vatan vahī hai

daulat kā jis kī aalam meñ chaar sū thā charchā

jis ke javāhroñ ne tājoñ ko nuur baḳhshā

ġhairoñ kā jis zamīñ kī khetī ne peT paalā

adbār ne palaT dī aa kar jahāñ kī kaayā

merā vatan vahī hai merā vatan vahī hai

bārish kī tarah jis meñ paḌtī thī ḳhair-o-barkat

miltī thī jis zamīñ meñ rozī bilā mashaqqat

saare jahāñ ne jā kar jis kī uḌaa.ī daulat

jis jā bar aa.ī apnī bad-kāriyoñ kī nik.hat

merā vatan vahī hai merā vatan vahī hai

bahtā thā jis zamīñ meñ ilm-o-hunar kā dariyā

qaumoñ ne baarī baarī chhāpa hai jis pe maarā

bām-e-falak pe chaḌh kar dekhā hai jis ne nīchā

jaur-e-falak ne jis jā ulTī bahā.ī gañgā

merā vatan vahī hai merā vatan vahī hai

gautam hue ki nanak kaki hue ki chishti

loadi hue ki tughlaq sayyad hue ki KHilji

aa aa ke jis mein un ki milti gai hai miTTi

na-ittifaqiyon ne jis par girai bijli

mera watan wahi hai mera watan wahi hai

unche pahaD jis ke the raston ko roke

dushman ko jis ke dariya late the par Dubo ke

ilm-o-hunar ki daulat jis ne luTai so ke

bachche gada hain jis ke sab apna mal kho ke

mera watan wahi hai mera watan wahi hai

daulat ka jis ki aalam mein chaar su tha charcha

jis ke jawahron ne tajon ko nur baKHsha

ghairon ka jis zamin ki kheti ne peT pala

adbar ne palaT di aa kar jahan ki kaya

mera watan wahi hai mera watan wahi hai

barish ki tarah jis mein paDti thi KHair-o-barkat

milti thi jis zamin mein rozi bila mashaqqat

sare jahan ne ja kar jis ki uDai daulat

jis ja bar aai apni bad-kariyon ki nikhat

mera watan wahi hai mera watan wahi hai

bahta tha jis zamin mein ilm-o-hunar ka dariya

qaumon ne bari bari chhapa hai jis pe mara

baam-e-falak pe chaDh kar dekha hai jis ne nicha

jaur-e-falak ne jis ja ulTi bahai ganga

mera watan wahi hai mera watan wahi hai