mere baste mein kya hai

schōl kā laḌkā huuñ maiñ

nanhā sā banjāra huuñ maiñ

jo chiiz hai vo ḳhaas hai

baste meñ mere paas hai

kuchh toffiyāñ kuchh goliyāñ

kuchh ber kuchh nimboliyāñ

kaḌvī kasīlī chhāliya

kuchh bach ga.iiñ kuchh khā liyā

parkār pencil aur rabber

rangīn kāġhaz aur colour

ye mor ke par dekhiye

la.al-o-javāhar dekhiye

māchis ke label dekhiye

kāġhaz kī bulbul dekhiye

lo ye kahīñ se aa ga.e

murġhī ke par TuuTe hue

sikke purāne daur ke

lahore ke bhanbor ke

ye dhaat hai bolān kī

ye uun cholistān kī

TukḌā hai ye billor kā

tohfa bahāvalpur kā

nīlam hai ye kashmīr kā

ye hai nagīna diir kā

phal vādi-e-kāġhān ke

meve vaziristān ke

ye ibn-e-inshā kī kitāb

tohfa milā hai lā-javāb

tasvīr rangā-rang hai

jo dekhtā hai dang hai

billī nahīñ bhālū hai ye

ḳhargosh kā ḳhālū hai ye

ye sab mire baste meñ hai

har phuul gul-daste meñ hai

jab pāñch paise lāoge

tab ek tohfa pāoge

school ka laDka hun main

nanha sa banjara hun main

jo chiz hai wo KHas hai

baste mein mere pas hai

kuchh toffiyan kuchh goliyan

kuchh ber kuchh nimboliyan

kaDwi kasili chhaaliya

kuchh bach gain kuchh kha liya

parkar pencil aur rabber

rangin kaghaz aur colour

ye mor ke par dekhiye

lal-o-jawahar dekhiye

machis ke label dekhiye

kaghaz ki bulbul dekhiye

lo ye kahin se aa gae

murghi ke par TuTe hue

sikke purane daur ke

lahore ke bhanbor ke

ye dhat hai bolan ki

ye un cholistan ki

TukDa hai ye billor ka

tohfa bahawalpur ka

nilam hai ye kashmir ka

ye hai nagina dir ka

phal wadi-e-kaghan ke

mewe waziristan ke

ye ibn-e-insha ki kitab

tohfa mila hai la-jawab

taswir ranga-rang hai

jo dekhta hai dang hai

billi nahin bhaalu hai ye

KHargosh ka KHalu hai ye

ye sab mere baste mein hai

har phul gul-daste mein hai

jab panch paise laoge

tab ek tohfa paoge