mere KHamosh KHuda

mire ḳhāmosh ḳhudā

saath mire bol zarā

mire andar to utar

merī tamannā meñ dhaḌak

maiñ jo āñkhoñ meñ

thakan rakh ke safar kartī huuñ

mirī rātoñ ko mire ḳhvāb na Das jaa.eñ kahīñ

mere andar vo ḳhayālāt na bas jaa.eñ kahīñ

jin ko mamnūa zamīnoñ kī hikāyāt kahā jaatā hai

tīrgī par jise likkhī huī vo raat kahā jaatā hai

jis kī qismat meñ kabhī koī sitāra na diyā hotā hai

jis ke māthe pe savere kā

koī bosa kabhī sabt nahīñ ho paatā

vo jo mahrūm-e-tamannā hai duā kā Dar hai

mire ḳhāmosh ḳhudā!

vaqt be-vaqt mirī āñkhoñ meñ

tapte paanī kī ye bhaḌkan kyuuñ hai

mere māthe pe tamannā kā koī rañg nahīñ

phir mire haath kī rekhāoñ meñ

uljhī huī duniyā kī kahānī kyuuñ hai

vo jo atrāf mire

mujh ko nazar aatī nahīñ

mere dil meñ vo udāsī kī

ravānī kyuuñ hai

kaun hai vo jo mujhe

''kūk'' kā an-dekhā bulāvā de kar

''hūk'' kī oT meñ chhup jaatā hai

jo mujhe mere tasavvur ke kisī aks meñ

raushan kar ke

ā.īna-ḳhāne meñ phir aag lagā jaatā hai

jis kī āñkhoñ meñ

mire ḳhvāb ke saare manzar

apne hone kī gavāhī meñ jiye jaate haiñ

vo gavāhī ki sahīfoñ meñ

jise maiñ ne tilāvat to kiyā hai lekin

vo gavāhī mere hone kī gavāhī to nahīñ

maiñ kahāñ huuñ

mirā ma.alūm kahāñ hai

kis ne

mire andar mire maujūd ko nābūd kiyā

kaun hai

jo mirī rag rag meñ jiye jaatā hai

mirī duniyā se mujhe mulk-badar rakhtā hai

mere KHamosh KHuda

sath mere bol zara

mere andar to utar

meri tamanna mein dhaDak

main jo aankhon mein

thakan rakh ke safar karti hun

meri raaton ko mere KHwab na Das jaen kahin

mere andar wo KHayalat na bas jaen kahin

jin ko mamnua zaminon ki hikayat kaha jata hai

tirgi par jise likkhi hui wo raat kaha jata hai

jis ki qismat mein kabhi koi sitara na diya hota hai

jis ke mathe pe sawere ka

koi bosa kabhi sabt nahin ho pata

wo jo mahrum-e-tamanna hai dua ka Dar hai

mere KHamosh KHuda!

waqt be-waqt meri aankhon mein

tapte pani ki ye bhaDkan kyun hai

mere mathe pe tamanna ka koi rang nahin

phir mere hath ki rekhaon mein

uljhi hui duniya ki kahani kyun hai

wo jo atraf mere

mujh ko nazar aati nahin

mere dil mein wo udasi ki

rawani kyun hai

kaun hai wo jo mujhe

kuk ka an-dekha bulawa de kar

huk ki oT mein chhup jata hai

jo mujhe mere tasawwur ke kisi aks mein

raushan kar ke

aaina-KHane mein phir aag laga jata hai

jis ki aankhon mein

mere KHwab ke sare manzar

apne hone ki gawahi mein jiye jate hain

wo gawahi ki sahifon mein

jise main ne tilawat to kiya hai lekin

wo gawahi mere hone ki gawahi to nahin

main kahan hun

mera malum kahan hai

kis ne

mere andar mere maujud ko nabud kiya

kaun hai

jo meri rag rag mein jiye jata hai

meri duniya se mujhe mulk-badar rakhta hai