mere KHwab

ai mire hasīñ-ḳhvābo

tum kahāñ se aa.e ho

kis ufuq se ubhre ho

kis shafaq se nikhre ho

kin guloñ kī sohbat meñ

tum ne tarbiyat paa.ī

kis jahāñ se laa.e ho

ye jamāl-o-ra.anā.ī

jel to bhayānak hai

is zalīl duniyā meñ

husn kā guzar kaisā

rañg hai na nik.hat hai

nuur hai na jalva hai

jabr kī hukūmat hai

tum kahāñ se aa.e ho

ai mire hasīñ-ḳhvābo

maiñ ne tum ko dekhā hai

yaad ab nahīñ aatā

shāyad ek laḌkī kī

thartharātī palkoñ meñ

jagmagātī āñkhoñ meñ

yā kisī tabassum meñ

jo nahā ke niklā ho

āñsuoñ kī shabnam se

ik humakte bachche kī

muTThiyoñ ke phūloñ par

titliyoñ kī yūrish sī

aur maañ kī nazroñ meñ

saikḌoñ umīdoñ ke

shoḳh rañg gul-daste

maiñ ne tum ko dekhā hai

nannhī nannhī guḌiyoñ meñ

nāchte khilaunoñ meñ

yā rabar kī geñdoñ meñ

maiñ ne tum ko dekhā hai

ghuTniyoñ chale ho tum

totlī zabānoñ se

tum ne duudh māñgā hai

''ek shāh.zāda thā

ek shāhzādī thī''

is hasīñ kahānī par

jaane kitne bachchoñ ne

apne sar uThā.e haiñ

jaane kitnī āñkhoñ meñ

phuul muskurā.e haiñ

aur maiñ samajhtā huuñ

tum isī kahānī kī

sar-zamīñ se aa.e ho

kuchh kisān kanyā.eñ

sabz o surḳh shīshoñ kī

chūḌiyāñ kalā.ī meñ

aur galaT kī chāñdī kī

hañsuliyoñ se gardan meñ

niim chāñd ke halqe

choliyoñ pe lahngoñ par

zard zard miTTī ke

zard bel-būTe se

maile maile āñchal par

bāliyoñ ke bose haiñ

un ke haath meñ hañsie

giit gaane lagte haiñ

jhuum jhuum kar paude

apnā sar jhukāte haiñ

nau-javān laThyāre

khet kī muñDeroñ par

prem giit gaate haiñ

ai mire hasīñ-ḳhvābo

tum inheñ bahāroñ kī

koñpaloñ se phūTe ho

ek kār-ḳhāne meñ

chand nau-javānoñ ne

anjuman banā.ī hai

aur is meñ lenin kī

ik kitāb paḌhte haiñ

sun rahī haiñ dīvāreñ

hañs rahī hai tārīkī

nau-javān baiThe haiñ

aur kitāb paḌhte haiñ

ek ek jumle par

chauñk chauñk paḌte haiñ

ek ek fiqre par

apnā sar hilāte haiñ

gaah aah bharte haiñ

gaah muskurāte haiñ

maiñ ne un ke sīnoñ meñ

ai mire hasīñ-ḳhvābo

tum ko nāchte dekhā

maiñ ne tum ko dekhā hai

jab siyāh mehrābeñ

āsmāñ pe bantī haiñ

jab sukūt kī pariyāñ

kahkashāñ pe chaltī haiñ

gesuoñ kī nik.hat se

jab havā mahaktī haiñ

jab fazā chahaktī hai

mere garm hoñToñ par

pyaar thartharāte haiñ

aur merī mahbūba

apne rañg-e-āriz se

bijliyāñ banātī hai

aur merī nazroñ meñ

ik jahān miTtā hai

ik jahān bantā hai

ik zamīn haTtī hai

ik zamīn aatī hai

maiñ asiir huuñ lekin

tum ko koī bhī qānūn

qaid kar nahīñ saktā

sar-buland aur āzād

yuuñ hī muskurā.e jaao

mere dil kī duniyā meñ

yuuñ hī jagmagā.e jaao

qaid-o-band ke jallād

tum ko pā nahīñ sakte

lambe lambe zālim haath

tum ko chhū nahīñ sakte

ai mire hasīñ-ḳhvābo

ai mere hasin-KHwabo

tum kahan se aae ho

kis ufuq se ubhre ho

kis shafaq se nikhre ho

kin gulon ki sohbat mein

tum ne tarbiyat pai

kis jahan se lae ho

ye jamal-o-ranai

jel to bhayanak hai

is zalil duniya mein

husn ka guzar kaisa

rang hai na nikhat hai

nur hai na jalwa hai

jabr ki hukumat hai

tum kahan se aae ho

ai mere hasin-KHwabo

main ne tum ko dekha hai

yaad ab nahin aata

shayad ek laDki ki

thartharaati palkon mein

jagmagati aankhon mein

ya kisi tabassum mein

jo naha ke nikla ho

aansuon ki shabnam se

ek humakte bachche ki

muTThiyon ke phulon par

titliyon ki yurish si

aur man ki nazron mein

saikDon umidon ke

shoKH rang gul-daste

main ne tum ko dekha hai

nannhi nannhi guDiyon mein

nachte khilaunon mein

ya rabar ki gendon mein

main ne tum ko dekha hai

ghuTniyon chale ho tum

totli zabanon se

tum ne dudh manga hai

ek shahzada tha

ek shahzadi thi

is hasin kahani par

jaane kitne bachchon ne

apne sar uThae hain

jaane kitni aankhon mein

phul muskurae hain

aur main samajhta hun

tum isi kahani ki

sar-zamin se aae ho

kuchh kisan kanyaen

sabz o surKH shishon ki

chuDiyan kalai mein

aur galaT ki chandi ki

hansuliyon se gardan mein

nim chand ke halqe

choliyon pe lahngon par

zard zard miTTi ke

zard bel-buTe se

maile maile aanchal par

baaliyon ke bose hain

un ke hath mein hansie

git gane lagte hain

jhum jhum kar paude

apna sar jhukate hain

nau-jawan laThyare

khet ki munDeron par

prem git gate hain

ai mere hasin-KHwabo

tum inhen bahaaron ki

konpalon se phuTe ho

ek kar-KHane mein

chand nau-jawanon ne

anjuman banai hai

aur is mein lenin ki

ek kitab paDhte hain

sun rahi hain diwaren

hans rahi hai tariki

nau-jawan baiThe hain

aur kitab paDhte hain

ek ek jumle par

chaunk chaunk paDte hain

ek ek fiqre par

apna sar hilate hain

gah aah bharte hain

gah muskuraate hain

main ne un ke sinon mein

ai mere hasin-KHwabo

tum ko nachte dekha

main ne tum ko dekha hai

jab siyah mehraben

aasman pe banti hain

jab sukut ki pariyan

kahkashan pe chalti hain

gesuon ki nikhat se

jab hawa mahakti hain

jab faza chahakti hai

mere garm honTon par

pyar thartharaate hain

aur meri mahbuba

apne rang-e-ariz se

bijliyan banati hai

aur meri nazron mein

ek jahan miTta hai

ek jahan banta hai

ek zamin haTti hai

ek zamin aati hai

main asir hun lekin

tum ko koi bhi qanun

qaid kar nahin sakta

sar-buland aur aazad

yun hi muskurae jao

mere dil ki duniya mein

yun hi jagmagae jao

qaid-o-band ke jallad

tum ko pa nahin sakte

lambe lambe zalim hath

tum ko chhu nahin sakte

ai mere hasin-KHwabo