mere purkhon ki pahli dua

raat kī kokh se

sub.h kī ek nannhī kiran ne janam yuuñ liyā

shab ne nannhī shafaq kī gulābī hasīñ muTThiyāñ khol kar

kuchh lakīreñ paḌhīñ

aur sabā se na ma.alūm chupke se kyā kah diyā

yuuñ ki shabnam kī āñkhoñ se aañsū bahe

ik sitāra hañsā

chāñdnī muskurātī huī chal paḌī

aur naqāhat se pahlū badalte hue

chauñk kar merī maañ ne baḌe shauq se

kuchh ishāra kiyā

āhaToñ aur sargoshiyoñ meñ kisī ne kahā

aah laḌkī hai ye

itnī afsurda āvāz mere ḳhudā

merī pahlī samā.at pe likkhī ga.ī

merī pahlī hī sāñsoñ meñ gholā gayā

in shikasta se lahjoñ kā zahrīlā-pan

aah laḌkī hai

laḌkī hai

laḌkī hai ye

is kī qismat kī māñgo duā

ab bhī merī samā.at pe likkhī hai vo

mere purkhoñ kī pahlī duā

raat ki kokh se

subh ki ek nannhi kiran ne janam yun liya

shab ne nannhi shafaq ki gulabi hasin muTThiyan khol kar

kuchh lakiren paDhin

aur saba se na malum chupke se kya kah diya

yun ki shabnam ki aankhon se aansu bahe

ek sitara hansa

chandni muskuraati hui chal paDi

aur naqahat se pahlu badalte hue

chaunk kar meri man ne baDe shauq se

kuchh ishaara kiya

aahaTon aur sargoshiyon mein kisi ne kaha

aah laDki hai ye

itni afsurda aawaz mere KHuda

meri pahli samaat pe likkhi gai

meri pahli hi sanson mein ghola gaya

in shikasta se lahjon ka zahrila-pan

aah laDki hai

laDki hai

laDki hai ye

is ki qismat ki mango dua

ab bhi meri samaat pe likkhi hai wo

mere purkhon ki pahli dua