meri maut ke masiha!

merī maut ke masīhā!

tiin barr-e-āzmoñ pe tum ne merā pīchhā kiyā hai

mausam badalte rahe taqdīr kī tarah

maiñ shahr shahr phirā dhuup kī tarah

maiñ ne ḳhāmoshiyāñ lafzoñ ke supurd kiiñ

zabān ke lafz badle

magar tum ik tārīk surañg kī tarah saaya saaya

mere shu.ūr meñ utarte chale ga.e ho

mere zehn mere jism mere qalb ke ma.akūs ruḳh!

merī tahrīroñ ke āseb!

tum merī tanhā.ī ho mere vajūd kī intihā aur shikast

chāhe hue badan tumhārī āġhosh meñ raakh ho ga.e haiñ

abadī ḳhāmosh harīf!

tum kā.enāt ke tamām nuur ke saath shatranj khelte rahe ho

maiñ nai tumhārī quvvatoñ kī hama-gīr gunjalak bisāt pe

ḳhāna-ba-ḳhāna...

ishq aur lafzoñ kī salībeñ bichhā.īñ:

tum havāoñ kī misāl mere ās-pās baraste rahe

tum har shaam phūloñ pe yalġhār karte pāniyoñ pe chalte rahe ho

ye jānte hue bhī ki mere lafz

ret ke chehre pe khiñche hue be-sabāt naqsh haiñ

maiñ ne har ibtidā har intihā kā isbāt kiyā hai

fāsloñ kī tarah tum sab kuchh nikalte chale ga.e ho

hamārā jhagḌā tā-umr jaarī rahegā

mere sāñsoñ ke sāthī aur dushman:

mere ham-shakl:

muqaddar kī band kitāb:

maiñ ne tumhāre raaz jānñe chāhe

calendar kī tārīḳhoñ meñ tumheñ paḌhnā chāhā

palkoñ ke darmiyān tumhāre libās ke nā-mālūm taar bichhā.e

yaad rakho!

har raushnī ne tumheñ apne faanī sho.aloñ meñ lapeTnā chāhā

magar vaqt kī kalīd!

tum ne kunjiyoñ kā guchchā na jaane kis miTTī meñ dafn kar diyā hai

tum jhūTe lafzoñ kī tarah

merī uñgliyoñ meñ se phisalte chale ga.e ho

meri maut ke masiha!

tin barr-e-azmon pe tum ne mera pichha kiya hai

mausam badalte rahe taqdir ki tarah

main shahr shahr phira dhup ki tarah

main ne KHamoshiyan lafzon ke supurd kin

zaban ke lafz badle

magar tum ek tarik surang ki tarah saya saya

mere shuur mein utarte chale gae ho

mere zehn mere jism mere qalb ke makus ruKH!

meri tahriron ke aaseb!

tum meri tanhai ho mere wajud ki intiha aur shikast

chahe hue badan tumhaari aaghosh mein rakh ho gae hain

abadi KHamosh harif!

tum kaenat ke tamam nur ke sath shatranj khelte rahe ho

main nai tumhaari quwwaton ki hama-gir gunjalak bisat pe

KHana-ba-KHana

ishq aur lafzon ki saliben bichhain:

tum hawaon ki misal mere aas-pas baraste rahe

tum har sham phulon pe yalghaar karte paniyon pe chalte rahe ho

ye jaante hue bhi ki mere lafz

ret ke chehre pe khinche hue be-sabaat naqsh hain

main ne har ibtida har intiha ka isbaat kiya hai

faslon ki tarah tum sab kuchh nikalte chale gae ho

hamara jhagDa ta-umr jari rahega

mere sanson ke sathi aur dushman:

mere ham-shakl:

muqaddar ki band kitab:

main ne tumhaare raaz jaanne chahe

calendar ki tariKHon mein tumhein paDhna chaha

palkon ke darmiyan tumhaare libas ke na-malum tar bichhae

yaad rakho!

har raushni ne tumhein apne fani shoalon mein lapeTna chaha

magar waqt ki kalid!

tum ne kunjiyon ka guchcha na jaane kis miTTi mein dafn kar diya hai

tum jhuTe lafzon ki tarah

meri ungliyon mein se phisalte chale gae ho