meri pahli nazm

kyā bachche suljhe hote haiñ

jab geñd se uljhe hote haiñ

vo is liye mujh ko bhāte haiñ

din biite yaad dilāte haiñ

vo kitne hasīn basere the

jab duur ġhamoñ se Dere the

jo khel meñ haa.il hotā thā

nafrīn ke qābil hotā thā

har ik se ulajh kar rah jaanā

ruk ruk ke bahut kuchh kah jaanā

hañs denā bātoñ bātoñ par

barsāt kī kaalī rātoñ par

bādal kī subuk-raftārī par

bulbul kī āh-o-zārī par

aur sham.a kī lau kī garmī par

parvānoñ kī haT-dharmī par

duniyā ke dhande kyā jāneñ

āzād ye phande kyā jāneñ

ma.asūm fazā meñ rahte the

ham to ye samajh hī baiThe the

ḳhushiyoñ kā alam anjām nahīñ

duniyā meñ ḳhizāñ kā naam nahīñ

māhaul ne khāyā phir palTā

nāgāh taġhayyur aa jhapTā

aur us kī karam-farmā.ī se

hālāt kī ik añgḌā.ī se

aa pahuñche aise beḌoñ meñ

jo le ga.e hameñ thapeḌoñ meñ

bachpan ke suhāne saa.e the

saa.e meñ zarā sustā.e the

vo daur-e-muqaddas biit gayā

ye vaqt hī baazī jiit gayā

ab vaise mire hālāt nahīñ

vo chiiz nahīñ vo baat nahīñ

jiine kā safar ab dūbhar hai

har gaam pe sau sau Thokar hai

vo dil jo rūh-e-qarīna thā

āshāoñ kā ek ḳhazīna thā

is dil meñ nihāñ ab naale haiñ

tāroñ se ziyāda chhāle haiñ

jo hañsnā hañsānā hotā hai

rone ko chhupānā hotā hai

koī ġhuncha dil meñ khiltā hai

thoḌā sā sukūñ jab miltā hai

ġham tez qadam phir bhartā hai

ḳhushiyoñ kā ta.āqub kartā hai

maiñ sochtā rahtā huuñ yūñhī

āḳhir ye tafāvut kyā ma.anī

ye soch ajab taḌpātī hai

ā.ankhoñ meñ namī bhar jaatī hai

phir mujh se dil ye kahtā hai

maazī ko tū rotā rahtā hai

kuchh aa.heñ dabī sī rahne de

kuchh aañsū baaqī rahne de

ye haal bhī maazī honā hai

is par bhī tujhe kuchh ronā hai

kya bachche suljhe hote hain

jab gend se uljhe hote hain

wo is liye mujh ko bhate hain

din bite yaad dilate hain

wo kitne hasin basere the

jab dur ghamon se Dere the

jo khel mein hail hota tha

nafrin ke qabil hota tha

har ek se ulajh kar rah jaana

ruk ruk ke bahut kuchh kah jaana

hans dena baaton baaton par

barsat ki kali raaton par

baadal ki subuk-raftari par

bulbul ki aah-o-zari par

aur shama ki lau ki garmi par

parwanon ki haT-dharmi par

duniya ke dhande kya jaanen

aazad ye phande kya jaanen

masum faza mein rahte the

hum to ye samajh hi baiThe the

KHushiyon ka alam anjam nahin

duniya mein KHizan ka nam nahin

mahaul ne khaya phir palTa

nagah taghayyur aa jhapTa

aur us ki karam-farmai se

haalat ki ek angDai se

aa pahunche aise beDon mein

jo le gae hamein thapeDon mein

bachpan ke suhane sae the

sae mein zara sustae the

wo daur-e-muqaddas bit gaya

ye waqt hi bazi jit gaya

ab waise mere haalat nahin

wo chiz nahin wo baat nahin

jine ka safar ab dubhar hai

har gam pe sau sau Thokar hai

wo dil jo ruh-e-qarina tha

aashaon ka ek KHazina tha

is dil mein nihan ab nale hain

taron se ziyaada chhaale hain

jo hansna hansana hota hai

rone ko chhupana hota hai

koi ghuncha dil mein khilta hai

thoDa sa sukun jab milta hai

gham tez qadam phir bharta hai

KHushiyon ka taaqub karta hai

main sochta rahta hun yunhi

aaKHir ye tafawut kya mani

ye soch ajab taDpati hai

aaankhon mein nami bhar jati hai

phir mujh se dil ye kahta hai

mazi ko tu rota rahta hai

kuchh aahen dabi si rahne de

kuchh aansu baqi rahne de

ye haal bhi mazi hona hai

is par bhi tujhe kuchh rona hai