meri shaeri aur naqqad

ai mire sher ke naqqād tujhe hai ye gila

ki nahīñ hai mire ehsās meñ sarmastī o kaif

ki nahīñ hai mire anfās meñ bū-e-mai-e-jām

chaman-e-dahr kī taqdīr ki maiñ huuñ vo ghaTā

jis ne sīkhā hī nahīñ abr-e-bahārī kā ḳhirām

raat tārīk hai aur maiñ huuñ vo ik sham-e-hazīñ

jis ke sho.ale meñ nahīñ sub.h-e-daraḳhshāñ kā payām

mere phūloñ meñ sabāon na bahāroñ kā guzar

merī rātoñ meñ sitāroñ na sharāroñ kā guzar

merī mahfil meñ na mutrib na muġhannī kā surūd

mere mai-ḳhāne meñ mauj-e-mai-e-ummīd harām

maiñ vo naqqāsh huuñ khoyā huā bhaTkā naqqāsh

jis ke har naqsh meñ taḳh.īl ke har paikar meñ

muskurātī hai baḌe naaz se rūh-e-ālām

ai mire dost! mire ġham ke parakhne vaale

bas chale merā to lā duuñ tujhe rūh-e-gul-e-tar

baḳhsh duuñ apnī taḌap, apnā junūñ apnī nazar

phir tujhe apne shab o roz kā aalam dikhlā.ūñ

har tabassum meñ tujhe shāibā-e-ġham dikhlā.ūñ

ḳhūn-e-nāhaq pe jo hotā hai vo mātam dikhlā.ūñ

partav-e-ḳhur se jo be-jāñ hai vo shabnam dikhlā.ūñ

tujh ko dikhlā.ūñ ki be-rañg hai kis darja sahar

tīra-o-tār sī ye raat, bhayānak sī fazā

Dagmagāte hue qadmoñ ko mire dost baḌhā

ik zarā aur bulandī pe ḳhudā-rā aa jā

dekh is vus.at-e-tārīk ke sannāTe ko

devtā maut kā khole hue jaise shahpar

aur is vus.at tārīk ke sannāTe meñ

koī chhīne liye jaatā hai sitāroñ kī damak

koī be-nūr kiye detā hai sho.aloñ kī lapak

koī kaliyoñ ko masaltā hai to phir kyā kiije

zaḳhm-e-gul tujh ko mahaknā hai to hañs hañs ke mahak

kaun sayyād kī nazroñ se bhalā bachtā hai

tā.ir-e-gosha-nashīñ! ḳhuub chahak! ḳhuub chahak!

jāgtī zard sī āñkheñ na kaheñ lag jaa.eñ

dard-e-iflās! zarā aur chamak aur chamak!

la.al-o-gauhar ke ḳhazāne bhī kahīñ bharte haiñ

araq-e-mehnat-e-majbūr! Tapak aur Tapak!

hai tire zo.af pe kuchh mastī-e-sahbā kā gumāñ

ai qadam aur bahak! aur bahak aur bahak!

vo chamaktī huī aa.ī tire sar par shamshīr

mizha-e-tiflak-e-māsūm jhapak! jald jhapak!

sīna-e-ḳhāk meñ be-kār huā jaatā hai jazb

ruḳh-e-be-dād pe ai ḳhuun jhalak! aah jhalak!

qatra qatra yūñhī Tapkātā rahegā koī zahr

tū bhī ai sabr ke sāġhar yūñhī tham tham ke chhalak!

maut kā raqs bhī kiyā chiiz hai ai sham-e-hayāt!

haañ zarā aur bhaḌak aur bhaḌak aur bhaḌak!

har taraf kārgah-e-dahr meñ uThtā hai dhuāñ

har taraf maut ke āsār, tabāhī ke nishāñ

sard ajsām batāte nahīñ manzil kā patā

rāheñ vīrān haiñ, milte nahīñ raahī ke nishāñ

zulmat-e-ġham hai ki baḌhtī hī chalī jaatī hai

haañ magar kis ne jalā.e haiñ ye hikmat ke diye

āñkheñ chīḳheñ ki nikal aayā vo ummīd kā chāñd

chauñkā dīvāna ki dāmān-e-darīda ko siye

dauḌā mai-ḳhvār ki ik jām-e-mai-e-tund piye

ḳhvāhish-e-marg mire siine meñ hone lagī zab.h

Dūbte dil ne duā māñgī kī kuchh aur jiye

yak-ba-yak āñdhiyāñ uThne lagīñ har jānib se

aan kī aan maiñ gahnā gayā ummīd kā chāñd

aan kī aan meñ gul ho ga.e hikmat ke diye

na to dīvāne kā dāmān-e-darīda hī silā

na to mai-ḳhvār ko ik qatra-e-sahbā hī milā

badliyāñ chhaTne na paa.ī thiiñ ki phir chhāne lagīñ

bijliyāñ sar pe isī taur se lahrāne lagīñ

jis ke siine meñ hoñ ai dost hazāroñ nāsūr

jīte-jī us ne bhalā chain kabhī paayā hai

aah aa.ī hai mire lab pe to kyūñkar rokūñ

kyā karūñ ashk agar palkoñ pe Dhal aayā hai

lekin ai dost! mire dard ke be-his naqqād

mire aañsū mirī aaheñ bhī to kuchh kahtī haiñ

mirī afsurda nigāheñ bhī to kuchh kahtī haiñ

aur dāġh-e-dil-e-nākām dikhā.ūñ kaise

dil-e-ḳhūñ-gashta kā paiġhām sunā.ūñ kaise

yuuñ to kahne ko ye aañsū haiñ bas ik qatra-e-āb

jin meñ surḳhī dil-e-pur-ḳhūñ kī na soz o tab-o-tāb

par koī narm sā jab raag sunā dete haiñ

yahī aañsū haiñ ki ik aag lagā dete haiñ

chain kab detī haiñ afsurda nigāheñ merī

āñdhiyāñ sīnoñ meñ bhar detī haiñ aaheñ merī

sabr ai dost! abhī sard kahāñ ġham kī aag

lab tak aa.e bhī to jal jā.eñge sab aish ke raag

sabr ai dost ki ik aisā bhī din aa.egā

ḳhaas ik had se guzar jā.egā pastī kā shu.ūr

sīna-e-ḳhāk se phir uTThegā vo shor-e-nushūr

gumbad-e-tīra-e-aflāk bhī tharrā.egā

vo asīrān-e-balā kā dar-e-zindāñ pe hujūm

kāñptī TūTtī zanjīroñ pe raqs-e-be-rabt

raqs-e-be-rabt meñ phir rabt sā aa jā.egā

ġhair ke sāġhar-e-zarpāsh kā phir jo bhī ho hashr

apnā hī jām-e-sifālīñ koī chhalkā.egā

gesū-e-shāhid-e-gītī meñ piro kar motī

koī dīvāna bahut dād-e-junūñ pā.egā

sabr ai dost ki ik aisā bhī din aa.egā

anjuman badlegī sab saaz badal jā.eñge

gaane vāloñ ke bhī andāz badal jā.eñge

ai mere sher ke naqqad tujhe hai ye gila

ki nahin hai mere ehsas mein sarmasti o kaif

ki nahin hai mere anfas mein bu-e-mai-e-jam

chaman-e-dahr ki taqdir ki main hun wo ghaTa

jis ne sikha hi nahin abr-e-bahaari ka KHiram

raat tarik hai aur main hun wo ek sham-e-hazin

jis ke shoale mein nahin subh-e-daraKHshan ka payam

mere phulon mein sabaon na bahaaron ka guzar

meri raaton mein sitaron na shararon ka guzar

meri mahfil mein na mutrib na mughanni ka surud

mere mai-KHane mein mauj-e-mai-e-ummid haram

main wo naqqash hun khoya hua bhaTka naqqash

jis ke har naqsh mein taKHil ke har paikar mein

muskuraati hai baDe naz se ruh-e-alam

ai mere dost! mere gham ke parakhne wale

bas chale mera to la dun tujhe ruh-e-gul-e-tar

baKHsh dun apni taDap, apna junun apni nazar

phir tujhe apne shab o roz ka aalam dikhlaun

har tabassum mein tujhe shaiba-e-gham dikhlaun

KHun-e-nahaq pe jo hota hai wo matam dikhlaun

partaw-e-KHur se jo be-jaan hai wo shabnam dikhlaun

tujh ko dikhlaun ki be-rang hai kis darja sahar

tira-o-tar si ye raat, bhayanak si faza

Dagmagate hue qadmon ko mere dost baDha

ek zara aur bulandi pe KHuda-ra aa ja

dekh is wusat-e-tarik ke sannaTe ko

dewta maut ka khole hue jaise shahpar

aur is wusat tarik ke sannaTe mein

koi chhine liye jata hai sitaron ki damak

koi be-nur kiye deta hai shoalon ki lapak

koi kaliyon ko masalta hai to phir kya kije

zaKHm-e-gul tujh ko mahakna hai to hans hans ke mahak

kaun sayyaad ki nazron se bhala bachta hai

tair-e-gosha-nashin! KHub chahak! KHub chahak!

jagti zard si aankhen na kahen lag jaen

dard-e-iflas! zara aur chamak aur chamak!

lal-o-gauhar ke KHazane bhi kahin bharte hain

araq-e-mehnat-e-majbur! Tapak aur Tapak!

hai tere zoaf pe kuchh masti-e-sahba ka guman

ai qadam aur bahak! aur bahak aur bahak!

wo chamakti hui aai tere sar par shamshir

mizha-e-tiflak-e-masum jhapak! jald jhapak!

sina-e-KHak mein be-kar hua jata hai jazb

ruKH-e-be-dad pe ai KHun jhalak! aah jhalak!

qatra qatra yunhi Tapkata rahega koi zahr

tu bhi ai sabr ke saghar yunhi tham tham ke chhalak!

maut ka raqs bhi kiya chiz hai ai sham-e-hayat!

han zara aur bhaDak aur bhaDak aur bhaDak!

har taraf kargah-e-dahr mein uThta hai dhuan

har taraf maut ke aasar, tabahi ke nishan

sard ajsam batate nahin manzil ka pata

rahen viran hain, milte nahin rahi ke nishan

zulmat-e-gham hai ki baDhti hi chali jati hai

han magar kis ne jalae hain ye hikmat ke diye

aankhen chiKHen ki nikal aaya wo ummid ka chand

chaunka diwana ki daman-e-darida ko siye

dauDa mai-KHwar ki ek jam-e-mai-e-tund piye

KHwahish-e-marg mere sine mein hone lagi zabh

Dubte dil ne dua mangi ki kuchh aur jiye

yak-ba-yak aandhiyan uThne lagin har jaanib se

aan ki aan main gahna gaya ummid ka chand

aan ki aan mein gul ho gae hikmat ke diye

na to diwane ka daman-e-darida hi sila

na to mai-KHwar ko ek qatra-e-sahba hi mila

badliyan chhaTne na pai thin ki phir chhane lagin

bijliyan sar pe isi taur se lahrane lagin

jis ke sine mein hon ai dost hazaron nasur

jite-ji us ne bhala chain kabhi paya hai

aah aai hai mere lab pe to kyunkar rokun

kya karun ashk agar palkon pe Dhal aaya hai

lekin ai dost! mere dard ke be-his naqqad

mere aansu meri aahen bhi to kuchh kahti hain

meri afsurda nigahen bhi to kuchh kahti hain

aur dagh-e-dil-e-nakaam dikhaun kaise

dil-e-KHun-gashta ka paigham sunaun kaise

yun to kahne ko ye aansu hain bas ek qatra-e-ab

jin mein surKHi dil-e-pur-KHun ki na soz o tab-o-tab

par koi narm sa jab rag suna dete hain

yahi aansu hain ki ek aag laga dete hain

chain kab deti hain afsurda nigahen meri

aandhiyan sinon mein bhar deti hain aahen meri

sabr ai dost! abhi sard kahan gham ki aag

lab tak aae bhi to jal jaenge sab aish ke rag

sabr ai dost ki ek aisa bhi din aaega

KHas ek had se guzar jaega pasti ka shuur

sina-e-KHak se phir uTThega wo shor-e-nushur

gumbad-e-tira-e-aflak bhi tharraega

wo asiran-e-bala ka dar-e-zindan pe hujum

kanpti TuTti zanjiron pe raqs-e-be-rabt

raqs-e-be-rabt mein phir rabt sa aa jaega

ghair ke saghar-e-zarpash ka phir jo bhi ho hashr

apna hi jam-e-sifalin koi chhalkaega

gesu-e-shahid-e-giti mein piro kar moti

koi diwana bahut dad-e-junun paega

sabr ai dost ki ek aisa bhi din aaega

anjuman badlegi sab saz badal jaenge

gane walon ke bhi andaz badal jaenge