meri shairi

zindagī kī sabhī rāhoñ se guzartā huuñ nadīm

jā.eza letā huuñ har moḌ pe shā.ir kā dimāġh

har badalte hue manzar pe nazar rakhtā huuñ

aur tārīk sī rātoñ meñ jalātā huuñ charāġh

zindagī kī sabhī rāhoñ se guzartā huuñ nadīm

jhilmilāte hue āñchal meñ sukūñ DhūñD chukā

ik tabassum ke liye ek ishāre ke liye

apne jazbāt meñ andāz-e-junūñ DhūñD chukā

zindagī kī sabhī rāhoñ se guzartā huuñ nadīm

parda-e-sāz meñ ik giit chhupāyā thā kabhī

apne ehsās kī parvāz baḌhāne ke liye

yaad hai madh-bharī āñkhoñ ko rulāyā thā kabhī

zindagī kī sabhī rāhoñ se guzartā huuñ nadīm

ye jhapaktī huī palkeñ haiñ ye lab ye ruḳhsār

ye to zulfeñ nahīñ sāvan kī ghaTā.eñ hoñgī

haañ yahī to haiñ ḳhayālāt ke rañgīñ shahkār

zindagī kī sabhī rāhoñ se guzartā huuñ nadīm

maiñ ne ik baar hī chheḌā thā mohabbat kā rabāb

saañs jalne lagī thī jism laraz uTThā thā

maiñ ne piine ke liye sirf uñDelī thī sharāb

zindagī kī sabhī rāhoñ se guzartā huuñ nadīm

husn ko rahguzar-e-ām pe chalte dekhā

ek hī samt ināyāt ke dhāre na rahe

maiñ ne paanī ka.ī sotoñ se ubalte dekhā

zindagī kī sabhī rāhoñ se guzartā huuñ nadīm

maiñ ne ghuTte hue kamre meñ dhuāñ dekhā hai

tañg galiyoñ meñ banāvaT kī hañsī biktī hai

duur ik taaq pe miTTī kā diyā jaltā hai

zindagi ki sabhi rahon se guzarta hun nadim

jaeza leta hun har moD pe shair ka dimagh

har badalte hue manzar pe nazar rakhta hun

aur tarik si raaton mein jalata hun charagh

zindagi ki sabhi rahon se guzarta hun nadim

jhilmilate hue aanchal mein sukun DhunD chuka

ek tabassum ke liye ek ishaare ke liye

apne jazbaat mein andaz-e-junun DhunD chuka

zindagi ki sabhi rahon se guzarta hun nadim

parda-e-saz mein ek git chhupaya tha kabhi

apne ehsas ki parwaz baDhane ke liye

yaad hai madh-bhari aankhon ko rulaya tha kabhi

zindagi ki sabhi rahon se guzarta hun nadim

ye jhapakti hui palken hain ye lab ye ruKHsar

ye to zulfen nahin sawan ki ghaTaen hongi

han yahi to hain KHayalat ke rangin shahkar

zindagi ki sabhi rahon se guzarta hun nadim

main ne ek bar hi chheDa tha mohabbat ka rabab

sans jalne lagi thi jism laraz uTTha tha

main ne pine ke liye sirf unDeli thi sharab

zindagi ki sabhi rahon se guzarta hun nadim

husn ko rahguzar-e-am pe chalte dekha

ek hi samt inayat ke dhaare na rahe

main ne pani kai soton se ubalte dekha

zindagi ki sabhi rahon se guzarta hun nadim

main ne ghuTte hue kamre mein dhuan dekha hai

tang galiyon mein banawaT ki hansi bikti hai

dur ek taq pe miTTi ka diya jalta hai