middle-class

safed-poshī kī oT meñ be-shumār aaheñ chhupī huī haiñ

qarīn-e-jāñ hai

vahī subuk-sār-e-zindagī kā ḳhayāl aur bas

vo pur-sukūñ din

vo jhilmilātā jahāñ ki jis meñ

ham apne hisse kī zindagī kaash vālihāna guzār paate

ye chhoTī chhoTī sī ḳhvāhisheñ thiiñ

kisī baḌe shahr kī ka.ī manzila imārat se gir paḌīñ haiñ

phir un kā malba sameT kar ham

bataur īñdhan najis mashīnoñ meñ jhok aa.e

vo ḳhvāhisheñ ab dhuāñ dhuāñ haiñ

dhuāñ jo dil se nikal rahā hai

dhuāñ jo dil meñ utar rahā hai

jo roz-o-shab kā hisār ban kar

aziyyatoñ ke muhīb saa.e meñ Dhal rahā hai

magar ye saa.e zamāne-bhar kī tamāzatoñ ke muqāble meñ

kisī bhī ne.amat se kam nahīñ haiñ

lihāzā un par bhī ab usuul talab rasad kā nafāz hogā

hisāb-o-dftar ye mez kursī ke ba.ad ma.alūm ho sakegā

ki apnī gum-gashta hasratoñ ke sahāb meñ se

hamāre hisse meñ kyā bachā hai

hamārī qismat meñ likhā hai

bisāt-e-nau ke hamīñ khilāḌī hamī khilaune

hameñ tamāsha lagāne vaale

hameñ fasāna banāne vaale

magar hamārā na tazkira hai kahāniyoñ meñ

kisī tamāshe meñ koī kirdār tak nahīñ hai

fanā ke naġhme rijā.iyat ke suroñ meñ gaanā

hameñ sikhāyā hai zindagī ne

yahī batāyā hai zindagī ne

hamāre ġham kā nisāb tai hai

hamārī manzil bhī tai-shuda hai

ki us se aage guzar hamārā

agar huā bhī to vājibī sā

vo ḳhvāb saare jo ham ne dekhe

sarāb nikle azaab nikle

ye zindagī bhī ajiib shai hai

ki us ko paane meñ kho diyā hai usī ko ham ne

safed-poshi ki oT mein be-shumar aahen chhupi hui hain

qarin-e-jaan hai

wahi subuk-sar-e-zindagi ka KHayal aur bas

wo pur-sukun din

wo jhilmilata jahan ki jis mein

hum apne hisse ki zindagi kash walihana guzar pate

ye chhoTi chhoTi si KHwahishen thin

kisi baDe shahr ki kai manzila imarat se gir paDin hain

phir un ka malba sameT kar hum

bataur indhan najis mashinon mein jhok aae

wo KHwahishen ab dhuan dhuan hain

dhuan jo dil se nikal raha hai

dhuan jo dil mein utar raha hai

jo roz-o-shab ka hisar ban kar

aziyyaton ke muhib sae mein Dhal raha hai

magar ye sae zamane-bhar ki tamazaton ke muqable mein

kisi bhi neamat se kam nahin hain

lihaza un par bhi ab usul talab rasad ka nafaz hoga

hisab-o-dftar ye mez kursi ke baad malum ho sakega

ki apni gum-gashta hasraton ke sahab mein se

hamare hisse mein kya bacha hai

hamari qismat mein likha hai

bisat-e-nau ke hamin khilaDi hami khilaune

hamein tamasha lagane wale

hamein fasana banane wale

magar hamara na tazkira hai kahaniyon mein

kisi tamashe mein koi kirdar tak nahin hai

fana ke naghme rijaiyat ke suron mein gana

hamein sikhaya hai zindagi ne

yahi bataya hai zindagi ne

hamare gham ka nisab tai hai

hamari manzil bhi tai-shuda hai

ki us se aage guzar hamara

agar hua bhi to wajibi sa

wo KHwab sare jo hum ne dekhe

sarab nikle azab nikle

ye zindagi bhi ajib shai hai

ki us ko pane mein kho diya hai usi ko hum ne