middle-class

tumheñ mālūm hai nā

hamārā sahn chhoTā hai aur us meñ chand ḳhvāb hī ba-mushkil puure utarte haiñ

itnā khānā jo ghar meñ aa.e mehmān par bhī puurā ho

maañ kī davā.eñ vaqt par aa jaa.eñ

baap ko aḳhbār roz miltā rahe

bachchoñ ko qadre-behtar schōl meñ paḌhā sakeñ

bahan kī shādī ho jaa.e bhaa.ī bhī kisī qābil ho jaa.e

maiñ bāhar jā kar tumhāre maañ baap ke liye bhī kuchh karūñgā

vāpas jab ā.uñgā tumheñ kañgan dilvā dūñgā

yahīñ kahīñ koī chhoTī sī dukān banā lūñgā

so ye sab puurā karne ko vo bāhar des chalā gayā hai

use rozgār mil gayā hai sab achchhā chal rahā hai

lekin kuchh ḳhvāhisheñ haiñ nā-tamām ḳhvāhisheñ

kabhī ikaTThe icecream khānā

us ke kañdhe par sar rakh kar so jaanā

kabhī muskurānā kabhī ro denā

kisī shaam halkī phuvār meñ yūñhī us ke sañg bāhar nikal jaanā

chhe saal ho ga.e haiñ

vo duur des meñ hai aur maiñ tanhā

ḳhvāhisheñ hasrat kā ruup dhaar chukī haiñ

magar mere ghar kā āñgan bahut chhoTā hai

merī hasratoñ kī jagah nahīñ hai us meñ

so maiñ bahut ḳhush huuñ muskurātī rahtī huuñ

shukr hai sab achchhā chal rahā hai

vo duur des gayā hai

tumhein malum hai na

hamara sahn chhoTa hai aur us mein chand KHwab hi ba-mushkil pure utarte hain

itna khana jo ghar mein aae mehman par bhi pura ho

man ki dawaen waqt par aa jaen

bap ko aKHbar roz milta rahe

bachchon ko qadre-behtar school mein paDha saken

bahan ki shadi ho jae bhai bhi kisi qabil ho jae

main bahar ja kar tumhaare man bap ke liye bhi kuchh karunga

wapas jab aaunga tumhein kangan dilwa dunga

yahin kahin koi chhoTi si dukan bana lunga

so ye sab pura karne ko wo bahar des chala gaya hai

use rozgar mil gaya hai sab achchha chal raha hai

lekin kuchh KHwahishen hain na-tamam KHwahishen

kabhi ikaTThe icecream khana

us ke kandhe par sar rakh kar so jaana

kabhi muskurana kabhi ro dena

kisi sham halki phuwar mein yunhi us ke sang bahar nikal jaana

chhe sal ho gae hain

wo dur des mein hai aur main tanha

KHwahishen hasrat ka rup dhaar chuki hain

magar mere ghar ka aangan bahut chhoTa hai

meri hasraton ki jagah nahin hai us mein

so main bahut KHush hun muskuraati rahti hun

shukr hai sab achchha chal raha hai

wo dur des gaya hai