mir ho mirza ho mera ji ho

miir ho mirzā ho miirā jī ho

nā-rasā haath kī nam-nākī hai

ek hī chīḳh hai furqat ke bayābānoñ meñ

ek hī tūl-e-alam-nākī hai

ek hī ruuh jo behāl hai zindānoñ meñ

ek hī qaid tamannā kī hai

ahd-e-rafta ke bahut ḳhvāb tamannā meñ haiñ

aur kuchh vāhme ā.inda ke

phir bhī andesha vo ā.īna hai jis meñ goyā

miir ho mirzā ho miirā jī ho

kuchh nahīñ dekhte haiñ

mahvar-e-ishq kī ḳhud-mast haqīqat ke sivā

apne hī biim o rajā apnī hī sūrat ke sivā

apne rañg apne badan apne hī qāmat ke sivā

apnī tanhā.i-e-jāñ-kāh kī dahshat ke sivā!

dil-ḳharāshī o jigar-chākī o ḳhūñ-afshānī

huuñ to nākām pe hote haiñ mujhe kaam bahut

mudda.ā mahv-e-tamāshā-e-shikast-e-dil hai

ā.ina-ḳhāne meñ koī liye jaatā hai mujhe

raat ke phaile añdhere meñ koī saayā na thā

chāñd ke aane pe saa.e aa.e

saa.e hilte hue ghulte hue kuchh bhuut se ban jaate haiñ

miir ho mirzā ho miirā jī ho

apnī hī zaat kī ġhirbāl meñ chhan jaate haiñ

dil-ḳharāshīda ho ḳhūñ-dāda rahe

ā.ina-ḳhāne ke rezoñ pe ham istāda rahe

chāñd ke aane pe saa.e bahut aa.e bhī

ham bahut sāyoñ se ghabrā.e bhī

miir ho mirzā ho miirā jī ho

aaj jaañ ik na.e hañgāme meñ dar aa.ī hai

māh-e-be-sāya kī dārā.ī hai

yaad vo ishrat-e-ḳhūñ-nāb kise

fursat-e-ḳhvāb kise

mir ho mirza ho mera ji ho

na-rasa hath ki nam-naki hai

ek hi chiKH hai furqat ke bayabanon mein

ek hi tul-e-alam-naki hai

ek hi ruh jo behaal hai zindanon mein

ek hi qaid tamanna ki hai

ahd-e-rafta ke bahut KHwab tamanna mein hain

aur kuchh wahme aainda ke

phir bhi andesha wo aaina hai jis mein goya

mir ho mirza ho mera ji ho

kuchh nahin dekhte hain

mahwar-e-ishq ki KHud-mast haqiqat ke siwa

apne hi bim o raja apni hi surat ke siwa

apne rang apne badan apne hi qamat ke siwa

apni tanhai-e-jaan-kah ki dahshat ke siwa!

dil-KHarashi o jigar-chaaki o KHun-afshani

hun to nakaam pe hote hain mujhe kaam bahut

muddaa mahw-e-tamasha-e-shikast-e-dil hai

aaina-KHane mein koi liye jata hai mujhe

raat ke phaile andhere mein koi saya na tha

chand ke aane pe sae aae

sae hilte hue ghulte hue kuchh bhut se ban jate hain

mir ho mirza ho mera ji ho

apni hi zat ki ghirbaal mein chhan jate hain

dil-KHarashida ho KHun-dada rahe

aaina-KHane ke rezon pe hum istada rahe

chand ke aane pe sae bahut aae bhi

hum bahut sayon se ghabrae bhi

mir ho mirza ho mera ji ho

aaj jaan ek nae hangame mein dar aai hai

mah-e-be-saya ki darai hai

yaad wo ishrat-e-KHun-nab kise

fursat-e-KHwab kise