mere bachche jawan ho gae hain

jo merī god meñ pal kar javān ho ga.e haiñ

mire safīne ke ab bādbān ho ga.e haiñ

vo jin pe niil ubharte the haath lagte hī

vo phuul jaise badan ab chaTTān ho ga.e haiñ

vo jin ko sīñchā thā maiñ ne ab un ke saa.e meñ huuñ

ki ab vo nanhe shajar sā.ebān ho ga.e haiñ

vo dekh-bhāl meñ jin kī guzar ga.ī mirī umr

ḳhudā kā shukr mire pāsbān ho ga.e haiñ

jo chand phuul mahakte the mere āñgan meñ

ḳhushā nasīb vo ḳhud gulistāñ ho ga.e haiñ

nahīñ jhuke hue shānoñ kā ab mujhe koī ġham

ḳhudā rakhe mire bachche javān ho ga.e haiñ

na paḌnā apne parā.e meñ tum mire bachcho

tabāh is se bahut ḳhāndān ho ga.e haiñ

vo jin kī fikr meñ rahtī thī maiñ 'vafā' bechain

ġham-o-ḳhushī ke mire tarjumān ho ga.e haiñ

jo meri god mein pal kar jawan ho gae hain

mere safine ke ab baadban ho gae hain

wo jin pe nil ubharte the hath lagte hi

wo phul jaise badan ab chaTTan ho gae hain

wo jin ko sincha tha main ne ab un ke sae mein hun

ki ab wo nanhe shajar saeban ho gae hain

wo dekh-bhaal mein jin ki guzar gai meri umr

KHuda ka shukr mere pasban ho gae hain

jo chand phul mahakte the mere aangan mein

KHusha nasib wo KHud gulistan ho gae hain

nahin jhuke hue shanon ka ab mujhe koi gham

KHuda rakhe mere bachche jawan ho gae hain

na paDna apne parae mein tum mere bachcho

tabah is se bahut KHandan ho gae hain

wo jin ki fikr mein rahti thi main 'wafa' bechain

gham-o-KHushi ke mere tarjuman ho gae hain