mere git

mire sarkash tarāne sun ke duniyā ye samajhtī hai

ki shāyad mere dil ko ishq ke naġhmoñ se nafrat hai

mujhe hañgāma-e-jañg-o-jadal meñ kaif miltā hai

mirī fitrat ko ḳhūñ-rezī ke afsāne se raġhbat hai

mirī duniyā meñ kuchh vaq.at nahīñ hai raqs o naġhma kī

mirā mahbūb naġhma shor-e-āhañg-e-baġhāvat hai

magar ai kaash dekheñ vo mirī pur-soz rātoñ ko

maiñ jab tāroñ pe nazreñ gaaḌ kar aañsū bahātā huuñ

tasavvur ban ke bhūlī vārdāteñ yaad aatī haiñ

to soz-o-dard kī shiddat se pahroñ tilmilātā huuñ

koī ḳhvāboñ meñ ḳhvābīda umañgoñ ko jagātī hai

to apnī zindagī ko maut ke pahlū meñ paatā huuñ

maiñ shā.er huuñ mujhe fitrat ke nazzāroñ se ulfat hai

mirā dil dushman-e-naġhma-sarā.ī ho nahīñ saktā

mujhe insāniyat kā dard bhī baḳhshā hai qudarat ne

mirā maqsad faqat sho.ala-navā.ī ho nahīñ saktā

javāñ huuñ maiñ javānī laġhzishoñ kā ek tūfāñ hai

mirī bātoñ meñ rañg-e-pārsā.ī ho nahīñ saktā

mirī sarkash tarānoñ kī haqīqat hai to itnī hai

ki jab maiñ dekhtā huuñ bhuuk ke maare kisānoñ ko

ġharīboñ muflisoñ ko be-kasoñ ko be-sahāroñ ko

sisaktī nāznīnoñ ko taḌapte nau-javānoñ ko

hukūmat ke tashaddud ko imārat ke takabbur ko

kisī ke chīthaḌoñ ko aur shahanshāhī ḳhazānoñ ko

to dil tāb-e-nashāt-e-bazm-e-ishrat lā nahīñ saktā

maiñ chāhūñ bhī to ḳhvāb-āvar tarāne gā nahīñ saktā

mere sarkash tarane sun ke duniya ye samajhti hai

ki shayad mere dil ko ishq ke naghmon se nafrat hai

mujhe hangama-e-jang-o-jadal mein kaif milta hai

meri fitrat ko KHun-rezi ke afsane se raghbat hai

meri duniya mein kuchh waqat nahin hai raqs o naghma ki

mera mahbub naghma shor-e-ahang-e-baghawat hai

magar ai kash dekhen wo meri pur-soz raaton ko

main jab taron pe nazren gaD kar aansu bahata hun

tasawwur ban ke bhuli wardaten yaad aati hain

to soz-o-dard ki shiddat se pahron tilmilata hun

koi KHwabon mein KHwabida umangon ko jagati hai

to apni zindagi ko maut ke pahlu mein pata hun

main shaer hun mujhe fitrat ke nazzaron se ulfat hai

mera dil dushman-e-naghma-sarai ho nahin sakta

mujhe insaniyat ka dard bhi baKHsha hai qudarat ne

mera maqsad faqat shoala-nawai ho nahin sakta

jawan hun main jawani laghzishon ka ek tufan hai

meri baaton mein rang-e-parsai ho nahin sakta

meri sarkash taranon ki haqiqat hai to itni hai

ki jab main dekhta hun bhuk ke mare kisanon ko

gharibon muflison ko be-kason ko be-sahaaron ko

sisakti nazninon ko taDapte nau-jawanon ko

hukumat ke tashaddud ko imarat ke takabbur ko

kisi ke chithaDon ko aur shahanshahi KHazanon ko

to dil tab-e-nashat-e-bazm-e-ishrat la nahin sakta

main chahun bhi to KHwab-awar tarane ga nahin sakta