mere hamdam mere dost!

gar mujhe is kā yaqīñ ho mire hamdam mire dost

gar mujhe is kā yaqīñ ho ki tire dil kī thakan

tirī āñkhoñ kī udāsī tere siine kī jalan

merī dil-jūī mire pyaar se miT jā.egī

gar mirā harf-e-tasallī vo davā ho jis se

jī uThe phir tirā ujḌā huā be-nūr dimāġh

terī peshānī se Dhal jaa.eñ ye tazlīl ke daaġh

terī bīmār javānī ko shifā ho jaa.e

gar mujhe is kā yaqīñ ho mire hamdam mare dost

roz o shab shaam o sahar maiñ tujhe bahlātā rahūñ

maiñ tujhe giit sunātā rahūñ halke shīrīñ

ābshāroñ ke bahāroñ ke chaman-zāroñ ke giit

āmad-e-sub.h ke, mahtāb ke, sayyāroñ ke giit

tujh se maiñ husn-o-mohabbat kī hikāyāt kahūñ

kaise maġhrūr hasīnāoñ ke barfāb se jism

garm hāthoñ kī harārat meñ pighal jaate haiñ

kaise ik chehre ke Thahre hue mānūs nuqūsh

dekhte dekhte yak-laḳht badal jaate haiñ

kis tarah āriz-e-mahbūb kā shaffāf bilor

yak-ba-yak bāda-e-ahmar se dahak jaatā hai

kaise gulchīñ ke liye jhuktī hai ḳhud shāḳh-e-gulāb

kis tarah raat kā aivān mahak jaatā hai

yūñhī gaatā rahūñ gaatā rahūñ terī ḳhātir

giit buntā rahūñ baiThā rahūñ terī ḳhātir

par mire giit tire dukh kā mudāvā hī nahīñ

naġhma jarrāh nahīñ mūnis-o-ġham ḳhvār sahī

giit nashtar to nahīñ marham-e-āzār sahī

tere āzār kā chāra nahīñ nashtar ke sivā

aur ye saffāk masīhā mire qabze meñ nahīñ

is jahāñ ke kisī zī-rūh ke qabze meñ nahīñ

haañ magar tere sivā tere sivā tere sivā

gar mujhe is ka yaqin ho mere hamdam mere dost

gar mujhe is ka yaqin ho ki tere dil ki thakan

teri aankhon ki udasi tere sine ki jalan

meri dil-jui mere pyar se miT jaegi

gar mera harf-e-tasalli wo dawa ho jis se

ji uThe phir tera ujDa hua be-nur dimagh

teri peshani se Dhal jaen ye tazlil ke dagh

teri bimar jawani ko shifa ho jae

gar mujhe is ka yaqin ho mere hamdam mare dost

roz o shab sham o sahar main tujhe bahlata rahun

main tujhe git sunata rahun halke shirin

aabshaaron ke bahaaron ke chaman-zaron ke git

aamad-e-subh ke, mahtab ke, sayyaron ke git

tujh se main husn-o-mohabbat ki hikayat kahun

kaise maghrur hasinaon ke barfab se jism

garm hathon ki hararat mein pighal jate hain

kaise ek chehre ke Thahre hue manus nuqush

dekhte dekhte yak-laKHt badal jate hain

kis tarah aariz-e-mahbub ka shaffaf bilor

yak-ba-yak baada-e-ahmar se dahak jata hai

kaise gulchin ke liye jhukti hai KHud shaKH-e-gulab

kis tarah raat ka aiwan mahak jata hai

yunhi gata rahun gata rahun teri KHatir

git bunta rahun baiTha rahun teri KHatir

par mere git tere dukh ka mudawa hi nahin

naghma jarrah nahin munis-o-gham KHwar sahi

git nashtar to nahin marham-e-azar sahi

tere aazar ka chaara nahin nashtar ke siwa

aur ye saffak masiha mere qabze mein nahin

is jahan ke kisi zi-ruh ke qabze mein nahin

han magar tere siwa tere siwa tere siwa