mere par na bandho

paroñ ko mire tum na resham kī Dorī se bāñdho

na kaaTo inheñ tum

ki mujh ko bhī uḌne do ūñchī uḌaan

maiñ titlī huuñ aisī

ki jis ke paroñ se

chamaktī jhamaktī haiñ

rañgoñ kī maujeñ

ye maujeñ mirī raah kī mish.aleñ ban ga.ī haiñ

miTā.eñgī jo terī merī tiira shaboñ kī

dhundalke miTā.eñgī sub.hoñ ke merī

paroñ ko mire tum na resham kī Dorī se bāñdho

na kaaTo inheñ tum

ki un hī sunahrī paroñ ke sahāre

mujhe paar karnā hai is rā.egāñ dasht ko

aur ḳhayāloñ ke aise jazīre meñ jaanā hai

jis tak kisī kī rasā.ī bhī mumkin nahīñ hai

mire vāste jo hamesha se nādīdanī hai

magar maiñ ne baḳhshe haiñ us ko ḳhayāloñ ke rañgīn paikar

utarnā hai us des meñ

jis ke phūloñ kī ḳhushbū

mirī muntazir hai

rañgoñ ke paikar mire muntazir haiñ

mujhe DhūñDte haiñ

vahāñ andalīboñ ke naġhme

usī des meñ

kitnī nau-ḳhez kaliyoñ ke rañgīñ-badan meñ machaltī huī

kitnī muñh-zor ḳhushbueñ

band-e-qabā toḌne ko haiñ bechain

sab isti.āre mire vāste haiñ na.ī zindagī ke

bulāte haiñ mujh ko

paroñ ko mire tum na resham kī Dorī se bāñdho

na kaaTo inheñ tum

paron ko mere tum na resham ki Dori se bandho

na kaTo inhen tum

ki mujh ko bhi uDne do unchi uDan

main titli hun aisi

ki jis ke paron se

chamakti jhamakti hain

rangon ki maujen

ye maujen meri rah ki mishalen ban gai hain

miTaengi jo teri meri tera shabon ki

dhundalke miTaengi subhon ke meri

paron ko mere tum na resham ki Dori se bandho

na kaTo inhen tum

ki un hi sunahri paron ke sahaare

mujhe par karna hai is raegan dasht ko

aur KHayalon ke aise jazire mein jaana hai

jis tak kisi ki rasai bhi mumkin nahin hai

mere waste jo hamesha se nadidani hai

magar main ne baKHshe hain us ko KHayalon ke rangin paikar

utarna hai us des mein

jis ke phulon ki KHushbu

meri muntazir hai

rangon ke paikar mere muntazir hain

mujhe DhunDte hain

wahan andalibon ke naghme

usi des mein

kitni nau-KHez kaliyon ke rangin-badan mein machalti hui

kitni munh-zor KHushbuen

band-e-qaba toDne ko hain bechain

sab istiare mere waste hain nai zindagi ke

bulate hain mujh ko

paron ko mere tum na resham ki Dori se bandho

na kaTo inhen tum