meri aankhen

tumhārī diid kī ḳhvāhish liye

jab bhī tumhārī jhiil āñkhoñ tak pahuñchtī haiñ

vahāñ pahle se hī ik aañkh ya.anī tīsrī

maujūd hotī hai

ye sun rakkhā thā maiñ ne

roz-marra kī misāloñ meñ

ki andhoñ meñ jo kaanā ho

isī kā raaj chaltā hai

magar andar hī andar har koī vāqif hai

bhītar jo kahānī hai

yahāñ kaanā to biinā shaḳhs par bhī raaj kartā hai

ye kaanā kyā koī dajjāl hai

tum jis se Dar kar

mujh se pahle us ko

apnā aap achchhe se dikhātī hai

tum apnī diid kā pahlā nivāla us ko detī ho

mujhe jhūTā khilātī ho

nahīñ khānā mujhe dajjāl kā jhūTā

ye maiñ us se nahīñ

bas dil hī dil meñ ḳhud se kahtā huuñ

use ma.alūm hī kab hai

ki ye jo tīsrī hai

us ke retina kā pichhlā dar jahāñ khultā hai

vo dīvār duniyā ko nikaltī hai

merī bardāsht sah jaa.e

agar bas ek hī dajjāl tum ko dekh saktā ho

yahāñ lekin tumhārā sab kā sab

duniyā meñ jitne haiñ

vo sab ke sab

maiñ ye sab sah nahīñ saktā

tumheñ dekhe binā bhī rah nahīñ saktā

mujhe b pī kā koī mas.ala pahle nahīñ thā

haañ magar ab ḳhuun merā kholtā hai

jab kabhī gaaḌī chalāte vaqt koī board aa jaa.e

jahāñ likhā huā ho speed kam rakkheñ

yahāñ se kuchh qadam aage saḌak par

camere kī aañkh tum ko dekhtī hai

tumhaari did ki KHwahish liye

jab bhi tumhaari jhil aankhon tak pahunchti hain

wahan pahle se hi ek aankh yani tisri

maujud hoti hai

ye sun rakkha tha main ne

roz-marra ki misalon mein

ki andhon mein jo kana ho

isi ka raj chalta hai

magar andar hi andar har koi waqif hai

bhitar jo kahani hai

yahan kana to bina shaKHs par bhi raj karta hai

ye kana kya koi dajjal hai

tum jis se Dar kar

mujh se pahle us ko

apna aap achchhe se dikhati hai

tum apni did ka pahla niwala us ko deti ho

mujhe jhuTa khilati ho

nahin khana mujhe dajjal ka jhuTa

ye main us se nahin

bas dil hi dil mein KHud se kahta hun

use malum hi kab hai

ki ye jo tisri hai

us ke retina ka pichhla dar jahan khulta hai

wo diwar duniya ko nikalti hai

meri bardasht sah jae

agar bas ek hi dajjal tum ko dekh sakta ho

yahan lekin tumhaara sab ka sab

duniya mein jitne hain

wo sab ke sab

main ye sab sah nahin sakta

tumhein dekhe bina bhi rah nahin sakta

mujhe b pi ka koi masala pahle nahin tha

han magar ab KHun mera kholta hai

jab kabhi gaDi chalate waqt koi board aa jae

jahan likha hua ho speed kam rakkhen

yahan se kuchh qadam aage saDak par

camere ki aankh tum ko dekhti hai