meri jaan ab bhi apna husn wapas pher de mujhko

mirī jaañ ab bhī apnā husn vāpas pher de mujh ko

abhī tak dil meñ tere ishq kī qindīl raushan hai

tire jalvoñ se bazm-e-zindagī jannat-ba-dāman hai

mirī ruuh ab bhī tanhā.ī meñ tujh ko yaad kartī hai

har ik tār-e-nafas meñ aarzū bedār hai ab bhī

har ik be-rañg saa.at muntazir hai terī aamad kī

nigāheñ bichh rahī haiñ rāsta zar-kār hai ab bhī

magar jān-e-hazīñ sadme sahegī āḳhirash kab tak

tirī be-mehriyoñ par jaan degī āḳhirash kab tak

tirī āvāz meñ soī huī shīrīniyāñ āḳhir

mire dil kī fasurda ḳhalvatoñ meñ jā na pā.eñgī

ye ashkoñ kī farāvānī se dhundlā.ī huī āñkheñ

tirī rānā.iyoñ kī tamkanat ko bhuul jā.eñgī

pukāreñge tujhe to lab koī lazzat na pā.eñge

gulū meñ terī ulfat ke tarāne suukh jā.eñge

mabādā yād-hā-e-ahd-e-māzī mahv ho jaa.eñ

ye pārīna fasāne mauj-hā-e-ġham meñ kho jaa.eñ

mire dil kī tahoñ se terī sūrat dhul ke bah jaa.e

harīm-e-ishq kī sham-e-daraḳhshāñ bujh ke rah jaa.e

mabādā ajnabī duniyā kī zulmat gher le tujh ko

mirī jaañ ab bhī apnā husn vāpas pher de mujh ko

meri jaan ab bhi apna husn wapas pher de mujh ko

abhi tak dil mein tere ishq ki qindil raushan hai

tere jalwon se bazm-e-zindagi jannat-ba-daman hai

meri ruh ab bhi tanhai mein tujh ko yaad karti hai

har ek tar-e-nafas mein aarzu bedar hai ab bhi

har ek be-rang saat muntazir hai teri aamad ki

nigahen bichh rahi hain rasta zar-kar hai ab bhi

magar jaan-e-hazin sadme sahegi aaKHirash kab tak

teri be-mehriyon par jaan degi aaKHirash kab tak

teri aawaz mein soi hui shiriniyan aaKHir

mere dil ki fasurda KHalwaton mein ja na paengi

ye ashkon ki farawani se dhundlai hui aankhen

teri ranaiyon ki tamkanat ko bhul jaengi

pukarenge tujhe to lab koi lazzat na paenge

gulu mein teri ulfat ke tarane sukh jaenge

mabaada yaad-ha-e-ahd-e-mazi mahw ho jaen

ye parina fasane mauj-ha-e-gham mein kho jaen

mere dil ki tahon se teri surat dhul ke bah jae

harim-e-ishq ki sham-e-daraKHshan bujh ke rah jae

mabaada ajnabi duniya ki zulmat gher le tujh ko

meri jaan ab bhi apna husn wapas pher de mujh ko