miTTi ka diya

dekho bachcho maiñ huuñ miTTī kā diyā

be-haqīqat huuñ magar huuñ kaam kā

gas battī sham.a barqī qumqume

jitne bhī haiñ sab haiñ merī nasl ke

ḳhāmushī se raat bhar jaltā huuñ maiñ

par zabāñ se uf nahīñ kartā huuñ maiñ

ḳhud jalā kartā huuñ auroñ ke liye

dukh sahā kartā huuñ ġhairoñ ke liye

mujh se hai raushan añdherī raat hai

merī fitrat meñ ye kaisī baat hai

jhoñpaḌī meñ bhī hai mahfil meñ guzar

mehrbāñ yaksāñ huuñ maiñ har ek par

fā.eda pahuñchātā huuñ har ek ko

hindū ho muslim ho yā īsā.ī ho

maiñ samajhtā hī nahīñ huuñ zāt-pāt

merī nazroñ meñ hai insāñ ek zaat

raushnī pahuñchānā merā kaam hai

aap kī ḳhidmat mirā in.aam hai

dekho bachcho main hun miTTi ka diya

be-haqiqat hun magar hun kaam ka

gas batti shama barqi qumqume

jitne bhi hain sab hain meri nasl ke

KHamushi se raat bhar jalta hun main

par zaban se uf nahin karta hun main

KHud jala karta hun auron ke liye

dukh saha karta hun ghairon ke liye

mujh se hai raushan andheri raat hai

meri fitrat mein ye kaisi baat hai

jhonpaDi mein bhi hai mahfil mein guzar

mehrban yaksan hun main har ek par

faeda pahunchata hun har ek ko

hindu ho muslim ho ya isai ho

main samajhta hi nahin hun zat-pat

meri nazron mein hai insan ek zat

raushni pahunchana mera kaam hai

aap ki KHidmat mera inam hai