miTTi ka idrak

vasī' āsmān meñ uḌā

magar na ruk sakā

na chhū sakā kisī ko maiñ

na koī mujh ko chhū sakā

uḌā magar havās kā asiir jism

mubtalā-e-qaid-e-intihā huā

duur tak fazā fazā huī

duur tak ḳhalā ḳhalā huā

to yuuñ maiñ ḳhushbūoñ kī qaid se rihā huā

ik 'umr tak buland-qāmatoñ ke sar pe nāchtā rahā

zamīñ kā raqs ruk gayā

phir ek din zamīn āftāb se milī

jale bhune se log ruk ga.e

sabhī mire qadam pe jhuk ga.e

magar maiñ apne qad ke nāpne kī fikr meñ ghulā kiyā

tamām shīshe chūr-chūr

samundaroñ kī sat.h bhī nazar na aa.ī dūr-dūr

vasī' āsmān meñ uḌaan bhar ke thak gayā thā phir zamīn par rukā

maiñ miTTiyoñ ke jism kā asiir thā

maiñ miTTiyoñ ke jism kā asiir huuñ

thake qadam kā bojh kaun sah sakegā

soñdhī ḳhushbūoñ ke māsivā

maañ ke āñchaloñ ke māsivā

wasi' aasman mein uDa

magar na ruk saka

na chhu saka kisi ko main

na koi mujh ko chhu saka

uDa magar hawas ka asir jism

mubtala-e-qaid-e-intiha hua

dur tak faza faza hui

dur tak KHala KHala hua

to yun main KHushbuon ki qaid se riha hua

ek 'umr tak buland-qamaton ke sar pe nachta raha

zamin ka raqs ruk gaya

phir ek din zamin aaftab se mili

jale bhune se log ruk gae

sabhi mere qadam pe jhuk gae

magar main apne qad ke napne ki fikr mein ghula kiya

tamam shishe chur-chur

samundaron ki sath bhi nazar na aai dur-dur

wasi' aasman mein uDan bhar ke thak gaya tha phir zamin par ruka

main miTTiyon ke jism ka asir tha

main miTTiyon ke jism ka asir hun

thake qadam ka bojh kaun sah sakega

sondhi KHushbuon ke masiwa

man ke aanchalon ke masiwa