mohabbat ka ghar

yaad rahe

chāhatoñ kā ye shahr

ḳhvāboñ kā mohalla

ishq kī galī

aur kachchā makāñ mohabbat kā

jo hamārā hai

ḳhushbūoñ kī dīvāreñ haiñ jahāñ

ehsāsāt kī chhateñ

hañsī aur āñsuoñ se

lipā-putā āñgan hai

harā-bharā

gahrī chhāñv vaalā

pyaar kā ek peḌ hai jahāñ

qissoñ ke chauke meñ

bātoñ ke kuchh bartan

auñdhe haiñ sharmīle se

to kuchh sīdhe muskurāte hue

shikāyatoñ ke dhueñ se

kaale kuchh bartan

hamārā muñh tākte haiñ

ki kyuuñ nahīñ unheñ saaf kiyā

ragaḌ kar ham ne

bhītar ek trunk bhī hai

lamhoñ se bharā

reshmī chādaroñ meñ

yādoñ kī silvaTeñ haiñ

aale meñ jaltā charāġh

vo khūTiyoñ par laTakte

do jismoñ kī jhilliyāñ

jañgaloñ aur khiḌkiyoñ se

jhāñktī chāhateñ hamārī

darvāze kī chaukhaT se

Tapaktī huī

barsāt kī pāgal būñdeñ kuchh

havā ke kuchh jhoñke

aur na jaane kyā kyā

sab bik jā.egā ik din

samāj ke hāthoñ

rivājeñ boliyāñ lagā.eñgī

zaat bhaav baḌhā.egī apnā

aur ḳharīd leñge

janam ke zamīn-dār

vo makāñ hamārā

yaad rahe

chahaton ka ye shahr

KHwabon ka mohalla

ishq ki gali

aur kachcha makan mohabbat ka

jo hamara hai

KHushbuon ki diwaren hain jahan

ehsasat ki chhaten

hansi aur aansuon se

lipa-puta aangan hai

hara-bhara

gahri chhanw wala

pyar ka ek peD hai jahan

qisson ke chauke mein

baaton ke kuchh bartan

aundhe hain sharmile se

to kuchh sidhe muskuraate hue

shikayaton ke dhuen se

kale kuchh bartan

hamara munh takte hain

ki kyun nahin unhen saf kiya

ragaD kar hum ne

bhitar ek trunk bhi hai

lamhon se bhara

reshmi chadaron mein

yaadon ki silwaTen hain

aale mein jalta charagh

wo khuTiyon par laTakte

do jismon ki jhilliyan

jangalon aur khiDkiyon se

jhankti chahaten hamari

darwaze ki chaukhaT se

Tapakti hui

barsat ki pagal bunden kuchh

hawa ke kuchh jhonke

aur na jaane kya kya

sab bik jaega ek din

samaj ke hathon

riwajen boliyan lagaengi

zat bhaw baDhaegi apna

aur KHarid lenge

janam ke zamin-dar

wo makan hamara