mohabbat

mohabbat ahd-o-paimān-e-vafā hai

mohabbat hadd-e-imkān-e-vafā hai

mohabbat ik kitāb aisī hai jis kā

har ik unvān unvān-e-vafā hai

mohabbat phūlne-phalne kī shai hai

use pāmāl sabza mat banāo

diloñ ke qāfile chalte haiñ is par

so nā-hamvār rasta mat banāo

ise khilne do apne mausamoñ meñ

bahār-e-ahd-e-rafta mat banāo

ye hai ma.asūm aur nanhā parinda

use zanjīr-basta mat banāo

ye lahrātā huā āñchal hai is ko

kisī bādal kā TukḌā mat banāo

ye chashme kā mīThā saaf paanī

so is paanī ko gadlā mat banāo

ye hai āvāz mehdī aur latā kī

in āvāzoñ ko murda mat banāo

mohabbat tez dhuup aur bārishoñ meñ

jo dil vaale haiñ un kā sā.ebāñ hai

mohabbat kuchh na hone par bhī 'ashfāq'

duā detī huī sadiyoñ kī maañ hai

mohabbat ahd-o-paiman-e-wafa hai

mohabbat hadd-e-imkan-e-wafa hai

mohabbat ek kitab aisi hai jis ka

har ek unwan unwan-e-wafa hai

mohabbat phulne-phalne ki shai hai

use pamal sabza mat banao

dilon ke qafile chalte hain is par

so na-hamwar rasta mat banao

ise khilne do apne mausamon mein

bahaar-e-ahd-e-rafta mat banao

ye hai masum aur nanha parinda

use zanjir-basta mat banao

ye lahraata hua aanchal hai is ko

kisi baadal ka TukDa mat banao

ye chashme ka miTha saf pani

so is pani ko gadla mat banao

ye hai aawaz mehdi aur lata ki

in aawazon ko murda mat banao

mohabbat tez dhup aur barishon mein

jo dil wale hain un ka saeban hai

mohabbat kuchh na hone par bhi 'ashfaq'

dua deti hui sadiyon ki man hai