mohabbat

tujh ko gar merī zarūrat hai

to phir jān-e-hayāt

apne farsūda mohabbat ke ḳhayālāt badal

hijr o ġham rañj-o-alam vasl o firāq

is kaThin vaqt meñ

bejā sī shikāyāt na kar

dekh vo sab bhī to maiñ

dekh ki pahuñchā huuñ yahāñ

jis ko tū dekh le ik baar

to terī āñkheñ

umr bhar sakte ke aalam se na nikal paa.eñ

dekh maiñ is ajab maqām pe

aane se qabl

aisī rāhoñ se guzar aayā huuñ

jahāñ se tū

ek pal ko bhī jo guzre

to tere zaḳhm-e-pā

ban ke nāsūr tujhe

dard meñ rakkheñ har dam

dekh maiñ chāhat-o-ulfat kā to qaa.il magar

har ek chiiz har ek rishta zamāne meñ

mohabbat hai magar....

dekh is vaqt mere des meñ

phailī huī hai

har taraf ḳhuun kī bārūd kī

nafrat kī phuvār

sun zarā kone meñ rote hue

bachche kī pukār

dekh bārūd ke hāthoñ se ye

luthḌā huā jism

dekh rozī ko bhaTaktā huā

bachchoñ kā vo baap

dekh phir so ga.e

is des ke bachche bhūke

dekh us maañ kī taraf dekh

ki jis kī āñkheñ

nazreñ kho baiThī haiñ rote hue

us aas pe ki

lauT aa.egā vo us kā

javān la.al kabhī

ghar se niklā thā jo

hāthoñ meñ degrēyoñ ko liye...

aaj tak lauT ke aayā nahīñ

umreñ bītīñ...

mujh ko ye dard rakhā karte haiñ

nīndoñ se pare....

soch is dard meñ

chāhat kī kise ḳhvāhish ho

soch is dard meñ rāhat kī

kise ḳhvāhish ho

mujh ko jo karnā hai

vo ab un ke liye karnā hai

mujh ko jiinā hai to bas

un ke liye jiinā hai

maiñ ne maanā ki nahīñ aur koī

tujh sā hasīñ...

par mujhe soch kī

is lahr ne aa gherā hai

jis se chhuTkārā merī jaan

ab mumkin hī nahīñ

tujh ko gar merī zarūrat hai

to phir jān-e-hayāt

apne farsūda mohabbat ke ḳhayālāt badal

haath meñ haath de

aur phir tū mere saath meñ chal...

tujh ko gar meri zarurat hai

to phir jaan-e-hayat

apne farsuda mohabbat ke KHayalat badal

hijr o gham ranj-o-alam wasl o firaq

is kaThin waqt mein

beja si shikayat na kar

dekh wo sab bhi to main

dekh ki pahuncha hun yahan

jis ko tu dekh le ek bar

to teri aankhen

umr bhar sakte ke aalam se na nikal paen

dekh main is ajab maqam pe

aane se qabl

aisi rahon se guzar aaya hun

jahan se tu

ek pal ko bhi jo guzre

to tere zaKHm-e-pa

ban ke nasur tujhe

dard mein rakkhen har dam

dekh main chahat-o-ulfat ka to qail magar

har ek chiz har ek rishta zamane mein

mohabbat hai magar

dekh is waqt mere des mein

phaili hui hai

har taraf KHun ki barud ki

nafrat ki phuwar

sun zara kone mein rote hue

bachche ki pukar

dekh barud ke hathon se ye

luthDa hua jism

dekh rozi ko bhaTakta hua

bachchon ka wo bap

dekh phir so gae

is des ke bachche bhuke

dekh us man ki taraf dekh

ki jis ki aankhen

nazren kho baiThi hain rote hue

us aas pe ki

lauT aaega wo us ka

jawan lal kabhi

ghar se nikla tha jo

hathon mein degreeyon ko liye

aaj tak lauT ke aaya nahin

umren bitin

mujh ko ye dard rakha karte hain

nindon se pare

soch is dard mein

chahat ki kise KHwahish ho

soch is dard mein rahat ki

kise KHwahish ho

mujh ko jo karna hai

wo ab un ke liye karna hai

mujh ko jina hai to bas

un ke liye jina hai

main ne mana ki nahin aur koi

tujh sa hasin

par mujhe soch ki

is lahr ne aa ghera hai

jis se chhuTkara meri jaan

ab mumkin hi nahin

tujh ko gar meri zarurat hai

to phir jaan-e-hayat

apne farsuda mohabbat ke KHayalat badal

hath mein hath de

aur phir tu mere sath mein chal