mohabbat

maiñ jism o jaañ ke tamām rishtoñ se chāhtā huuñ

nahīñ samajhtā ki aisā kyuuñ hai

na ḳhāl-o-ḳhad kā jamāl us meñ na zindagī kā kamāl koī

jo koī us meñ hunar bhī hogā

to mujh ko is kī ḳhabar nahīñ hai

na jaane phir kyūñ!

maiñ vaqt ke dā.eroñ se bāhar kisī tasavvur meñ uḌ rahā huuñ

ḳhayāl meñ ḳhvāb o ḳhalvat-e-zāt o jalvat-e-bazm meñ shab o roz

mirā lahū apnī gardishoñ meñ usī kī tasbīh paḌh rahā hai

jo merī chāhat se be-ḳhabar hai

kabhī kabhī vo nazar churā kar qarīb se mere yuuñ bhī guzrā

ki jaise vo bā-ḳhabar hai

merī mohabbatoñ se

dil o nazar kī hikāyateñ sun rakhī haiñ us ne

mirī hī sūrat

vo vaqt ke dā.eroñ se bāhar kisī tasavvur meñ uḌ rahā hai

ḳhayāl meñ ḳhvāb o ḳhalvat-e-zāt o jalvat-e-bazm meñ shab o roz

vo jism o jaañ ke tamām rishtoñ se chāhtā hai

magar nahīñ jāntā ye vo bhī

ki aisā kyuuñ hai

maiñ sochtā huuñ vo sochtā hai

kabhī mile ham to ā.īnoñ ke tamām bātin ayaañ kareñge

haqīqatoñ kā safar kareñge

main jism o jaan ke tamam rishton se chahta hun

nahin samajhta ki aisa kyun hai

na KHal-o-KHad ka jamal us mein na zindagi ka kamal koi

jo koi us mein hunar bhi hoga

to mujh ko is ki KHabar nahin hai

na jaane phir kyun!

main waqt ke daeron se bahar kisi tasawwur mein uD raha hun

KHayal mein KHwab o KHalwat-e-zat o jalwat-e-bazm mein shab o roz

mera lahu apni gardishon mein usi ki tasbih paDh raha hai

jo meri chahat se be-KHabar hai

kabhi kabhi wo nazar chura kar qarib se mere yun bhi guzra

ki jaise wo ba-KHabar hai

meri mohabbaton se

dil o nazar ki hikayaten sun rakhi hain us ne

meri hi surat

wo waqt ke daeron se bahar kisi tasawwur mein uD raha hai

KHayal mein KHwab o KHalwat-e-zat o jalwat-e-bazm mein shab o roz

wo jism o jaan ke tamam rishton se chahta hai

magar nahin jaanta ye wo bhi

ki aisa kyun hai

main sochta hun wo sochta hai

kabhi mile hum to aainon ke tamam baatin ayan karenge

haqiqaton ka safar karenge