mohabbat ramz-e-hasti hai

mohabbat ḳhvāb-e-gul hai

shāḳh-e-dil kī suunī palkoñ par

laraztā ḳhvāb-e-gul

jo naḳhl-e-jāñ ke zard-rū

girte hue pattoñ kī

sāñsoñ meñ mahaktā hai

mohabbat zindagī ke sabz ufuq par

duur tak phailī huī ḳhushbū kī lau hai

jo kabhī dil ke darīchoñ meñ

utar kar muskurātī hai

to har-sū raushnī sī phail jaatī hai

mohabbat ramz-e-hastī hai

ye aisā bhed hai jo kitne barsoñ

balki umroñ kī

musalsal be-riyā kāvish pe khultā hai

to goyā yuuñ mohabbat

zindagī kā isti.āra hai

ki jis kā har bayāñ alfāz kī chhab

aur lahjoñ kā khanak se

māvarā ho kar bhī

duniyā-e-ma.āfī apnī ḳhāmoshī meñ rakhtā hai

mohabbat ḳhvāb-e-gul bhī hai

mohabbat ramz-e-hastī bhī

mohabbat KHwab-e-gul hai

shaKH-e-dil ki suni palkon par

larazta KHwab-e-gul

jo naKHl-e-jaan ke zard-ru

girte hue patton ki

sanson mein mahakta hai

mohabbat zindagi ke sabz ufuq par

dur tak phaili hui KHushbu ki lau hai

jo kabhi dil ke darichon mein

utar kar muskuraati hai

to har-su raushni si phail jati hai

mohabbat ramz-e-hasti hai

ye aisa bhed hai jo kitne barson

balki umron ki

musalsal be-riya kawish pe khulta hai

to goya yun mohabbat

zindagi ka istiara hai

ki jis ka har bayan alfaz ki chhab

aur lahjon ka khanak se

mawara ho kar bhi

duniya-e-maafi apni KHamoshi mein rakhta hai

mohabbat KHwab-e-gul bhi hai

mohabbat ramz-e-hasti bhi