mohabbat

urūs-e-shab kī zulfeñ thiiñ abhī nā-āshnā ḳham se

sitāre āsmāñ ke be-ḳhabar the lazzat-e-ram se

qamar apne libās-e-nau meñ begāna sā lagtā thā

na thā vāqif abhī gardish ke ā.īn-e-musallam se

abhī imkāñ ke zulmat-ḳhāne se ubhrī hī thī duniyā

mazāq-e-zindagī poshīda thā pahnā-e-ālam se

kamāl-e-nazm-e-hastī kī abhī thī ibtidā goyā

huvaidā thī nagīne kī tamannā chashm-e-ḳhātam se

sunā hai ālam-e-bālā meñ koī kīmiyā-gar thā

safā thī jis kī ḳhāk-e-pā meñ baḌh kar sāġhar-e-jam se

likhā thā arsh ke paa.e pe ik iksīr kā nusḳha

chhupāte the farishte jis ko chashm-e-rūh-e-ādam se

nigāheñ taak meñ rahtī thiiñ lekin kīmiyā-gar kī

vo is nusḳhe ko baḌh kar jāntā thā ism-e-āzam se

baḌhā tasbīh-ḳhvānī ke bahāne arsh kī jānib

tamannā-e-dilī āḳhir bar aa.ī sa.i-e-paiham se

phirāyā fikr-e-ajzā ne use maidān-e-imkāñ meñ

chhupegī kyā koī shai bārgāh-e-haq ke mahram se

chamak taare se māñgī chāñd se dāġh-e-jigar māñgā

uḌaa.ī tīrgī thoḌī sī shab kī zulf-e-barham se

taḌap bijlī se paa.ī huur se pākīzgī paa.ī

harārat lī nafas-hā-e-masīh-e-ibn-e-maryam se

zarā sī phir rubūbiyat se shān-e-be-niyāzī lī

malak se ājizī uftādgī taqdīr shabnam se

phir in ajzā ko gholā chashma-e-haivāñ ke paanī meñ

murkkab ne mohabbat naam paayā arsh-e-āzam se

muhavvis ne ye paanī hasti-e-nau-ḳhez par chhiḌkā

girah kholī hunar ne us ke goyā kār-e-ālam se

huī jumbish ayaañ zarroñ ne lutf-e-ḳhvāb ko chhoḌā

gale milne lage uTh uTh ke apne apne hamdam se

ḳhirām-e-nāz paayā āftāboñ ne sitāroñ ne

chaTak ġhunchoñ ne paa.ī daaġh paa.e lāla-zāroñ ne

urus-e-shab ki zulfen thin abhi na-ashna KHam se

sitare aasman ke be-KHabar the lazzat-e-ram se

qamar apne libas-e-nau mein begana sa lagta tha

na tha waqif abhi gardish ke aain-e-musallam se

abhi imkan ke zulmat-KHane se ubhri hi thi duniya

mazaq-e-zindagi poshida tha pahna-e-alam se

kamal-e-nazm-e-hasti ki abhi thi ibtida goya

huwaida thi nagine ki tamanna chashm-e-KHatam se

suna hai aalam-e-baala mein koi kimiya-gar tha

safa thi jis ki KHak-e-pa mein baDh kar saghar-e-jam se

likha tha arsh ke pae pe ek iksir ka nusKHa

chhupate the farishte jis ko chashm-e-ruh-e-adam se

nigahen tak mein rahti thin lekin kimiya-gar ki

wo is nusKHe ko baDh kar jaanta tha ism-e-azam se

baDha tasbih-KHwani ke bahane arsh ki jaanib

tamanna-e-dili aaKHir bar aai sai-e-paiham se

phiraya fikr-e-ajza ne use maidan-e-imkan mein

chhupegi kya koi shai bargah-e-haq ke mahram se

chamak tare se mangi chand se dagh-e-jigar manga

uDai tirgi thoDi si shab ki zulf-e-barham se

taDap bijli se pai hur se pakizgi pai

hararat li nafas-ha-e-masih-e-ibn-e-maryam se

zara si phir rububiyat se shan-e-be-niyazi li

malak se aajizi uftadgi taqdir shabnam se

phir in ajza ko ghola chashma-e-haiwan ke pani mein

murkkab ne mohabbat nam paya arsh-e-azam se

muhawwis ne ye pani hasti-e-nau-KHez par chhiDka

girah kholi hunar ne us ke goya kar-e-alam se

hui jumbish ayan zarron ne lutf-e-KHwab ko chhoDa

gale milne lage uTh uTh ke apne apne hamdam se

KHiram-e-naz paya aaftabon ne sitaron ne

chaTak ghunchon ne pai dagh pae lala-zaron ne