mubarak ho

āchānak

ḳhud meñ ye kaisī tabdīliyāñ mahsūs kar rahā huuñ maiñ

mere baal darāz aur ghane ho ga.e haiñ

maiñ ab do choTiyāñ bāñdhne lagā huuñ

merī āñkheñ pahle se ziyāda maḳhmūr ho ga.ī haiñ

vo ab dekhne ke bajā.e ziyāda rone lagī haiñ

mere hoñT kohre kī ThanD kī tarah safed paḌ ga.e haiñ

vo ab bolne ke bajā.e ziyāda kapkapāne lage haiñ

merā siina pahle sapāT thā

ab is par do uThāneñ uTh aa.ī haiñ

duudh sī koī shai is meñ ThāTheñ mārne lagī hai

maiñ pahle qamīs aur painT pahantā thā

ab maiñ shalvār aur jampar pahanñe lagā huuñ

lagtā hai abhī gyārah september hī ko maiñ

ġhusl-e-janābat se fāriġh huā huuñ

āchānak

achānak ḳhud meñ ye kaisī tabdīliyāñ

mahsūs kar rahā huuñ maiñ

abhī abhī thoḌī der pahle mujhe ek zabardast qai huī thī

daa.ī aa.ī thī

us ne merā jampar utaar ke merī kokh ke

merī kokh par

ThanDā Thaar qabr sā haath rakh ke kahā thā

mubārak ho tum maañ banñe vaale ho

aachanak

KHud mein ye kaisi tabdiliyan mahsus kar raha hun main

mere baal daraaz aur ghane ho gae hain

main ab do choTiyan bandhne laga hun

meri aankhen pahle se ziyaada maKHmur ho gai hain

wo ab dekhne ke bajae ziyaada rone lagi hain

mere honT kohre ki ThanD ki tarah safed paD gae hain

wo ab bolne ke bajae ziyaada kapkapane lage hain

mera sina pahle sapaT tha

ab is par do uThanen uTh aai hain

dudh si koi shai is mein ThaThen marne lagi hai

main pahle qamis aur painT pahanta tha

ab main shalwar aur jampar pahanne laga hun

lagta hai abhi gyarah september hi ko main

ghusl-e-janabat se farigh hua hun

aachanak

achanak KHud mein ye kaisi tabdiliyan

mahsus kar raha hun main

abhi abhi thoDi der pahle mujhe ek zabardast qai hui thi

dai aai thi

us ne mera jampar utar ke meri kokh ke

meri kokh par

ThanDa Thaar qabr sa hath rakh ke kaha tha

mubarak ho tum man banne wale ho