mubham pate par dusra KHat

ham-nashīñ

ḳhvāb-gāh-e-‘adam se pare

ek be-samt shahr-e-suḳhan ke mahalle meñ

apnā koī yā-aḳhī yā-aḳhī kah ke sadiyoñ se

āvāz detā rahā

maiñ jhiḌaktā rahā

har uḳhuvvat kī āvāz ko

ham-nashīñ

be-hunar be-irāda

koī bīs-sāla javāñ

apne ḳhvāboñ kī lāsheñ liye

ḳhvāhishoñ kā janāza uThā.e hue

saḳht sardī meñ vīrāñ paḌī shāre’-e-ām par

nam havāoñ kī yaḳh-bastagī se

ThiThurtā huā

jaanā chāhe kisī qabr-e-gumnām par

ik diyā us ko āvāz de

yā-aḳhī kah ke sur taan de

ham-nashīñ

bīs-sāla javāñ kyā kare

ḳhvāhishoñ kā janāza liye shāre’-e-‘ām par

kyā kare

apne ḳhvāboñ kī lāshoñ kā nauha kahe

apnī tā-der ḳhvāhish kā mātam kare

yā javāban uḳhuvvat ko āvāz de aur dam ghoñT le

ham-nashin

KHwab-gah-e-‘adam se pare

ek be-samt shahr-e-suKHan ke mahalle mein

apna koi ya-aKHi ya-aKHi kah ke sadiyon se

aawaz deta raha

main jhiDakta raha

har uKHuwwat ki aawaz ko

ham-nashin

be-hunar be-irada

koi bis-sala jawan

apne KHwabon ki lashen liye

KHwahishon ka janaza uThae hue

saKHt sardi mein viran paDi shaare’-e-am par

nam hawaon ki yaKH-bastagi se

ThiThurta hua

jaana chahe kisi qabr-e-gumnam par

ek diya us ko aawaz de

ya-aKHi kah ke sur tan de

ham-nashin

bis-sala jawan kya kare

KHwahishon ka janaza liye shaare’-e-‘am par

kya kare

apne KHwabon ki lashon ka nauha kahe

apni ta-der KHwahish ka matam kare

ya jawaban uKHuwwat ko aawaz de aur dam ghonT le