muddat hui aurat hue

mujh se sahelī ne kahā

mumtāz aisā likhtī jā

jis meñ hoñ kuchh chūḌiyoñ

jhankār kī bāteñ

kuchh tazkire hoñ chunriyoñ ke

iz.hār kī bāteñ

uḌte sunahrī āñchaloñ meñ

motiyoñ kī sī laḌī

pahlī vo shaitānī merī

pahlī vo jo merī hañsī

baalī umr kī dil-kashī

vo bachpane kī shoḳhiyāñ

ḳhvāboñ meñ ḳhvāhish ke sarāb

dhaḌkan kī vo sargoshiyāñ

goTā kanārī Tāñkte

uñgliyoñ meñ suuī kī chubhan

dāñtoñ meñ uñglī daab kar

hotī shurūa phir se lagan

pahlī dafa dhaḌkā thā kab

ye dil tujhe kuchh yaad hai

vo ḳhushbūoñ rañgoñ kī duniyā

ab bhī kyā ābād hai

maiñ ne kahā merī sakhī

duniyā kyā tū ne na takī

masrūf itnī zindagī

ki chūḌiyāñ pahnī nahīñ

jo chunariyāñ rañgīn thiiñ

vo dhuup le kar uḌ ga.iiñ

merī umr kī titliyāñ

ab aur jānib muḌ ga.iiñ

ab dupaTToñ par kabhī na

goTā motī Tāñktī huuñ

sūiyāñ hāthoñ par nahīñ ab

dil ko apne Tāñktī huuñ

ḳhushbuoñ ke des se

maiñ duur itnī aa ga.ī

jiine kī ḳhātir

mard sā

andāz maiñ apnā ga.ī

rishtoñ ko nātoñ ko nibhāte

farz adā karte hue

tū ne jo chauñkāyā lagā

muddat huī aurat hue

mujh se saheli ne kaha

mumtaz aisa likhti ja

jis mein hon kuchh chuDiyon

jhankar ki baaten

kuchh tazkire hon chunriyon ke

izhaar ki baaten

uDte sunahri aanchalon mein

motiyon ki si laDi

pahli wo shaitani meri

pahli wo jo meri hansi

baali umr ki dil-kashi

wo bachpane ki shoKHiyan

KHwabon mein KHwahish ke sarab

dhaDkan ki wo sargoshiyan

goTa kanari Tankte

ungliyon mein sui ki chubhan

danton mein ungli dab kar

hoti shurua phir se lagan

pahli dafa dhaDka tha kab

ye dil tujhe kuchh yaad hai

wo KHushbuon rangon ki duniya

ab bhi kya aabaad hai

main ne kaha meri sakhi

duniya kya tu ne na taki

masruf itni zindagi

ki chuDiyan pahni nahin

jo chunariyan rangin thin

wo dhup le kar uD gain

meri umr ki titliyan

ab aur jaanib muD gain

ab dupaTTon par kabhi na

goTa moti Tankti hun

suiyan hathon par nahin ab

dil ko apne Tankti hun

KHushbuon ke des se

main dur itni aa gai

jine ki KHatir

mard sa

andaz main apna gai

rishton ko naton ko nibhate

farz ada karte hue

tu ne jo chaunkaya laga

muddat hui aurat hue