muddat ke baad

muddat ke ba.ad tum se milā huuñ to ye khulā

ye vaqt aur fāsla dhoka nazar kā thā

chehre pe umr bhar kī masāfat raqam sahī

dil ke liye tamām safar lamha bhar kā thā

kaisī ajiib sā.at-e-dīdār hai ki ham

phir yuuñ mile ki jaise kabhī duur hī na the

āñkhoñ meñ kam-sinī ke vo sab ḳhvāb jaag uThe

jin meñ nigāh o dil kabhī majbūr hī na the

ma.asūm kis qadar thiiñ vo be-nām chāhateñ

bachpan se ham-kanār thā ahd-e-shabāb bhī

yuuñ ātish-e-badan meñ thī shabnam ghulī huī

mahtāb se ziyāda na thā āftāb bhī

phir vo havā chalī ki sabhī kuchh bikhar gayā

vo mahfileñ vo dost vo gul-rañg qahqahe

ab raqs-e-gard-bād kī sūrat hai zindagī

ye vaqt kā azaab kahāñ tak koī sahe

ab tum milīñ to kitne hī ġham haiñ tumhāre saath

patthar kī tarah tum ne gizārī hai zindagī

kitnā lahū jalāyā to ye phuul muskurā.e

kis kis jatan se tum ne sañvārī hai zindagī

maiñ ne bhī ek johd-e-musalsal meñ kaaT dī

vo umr thī jo phuul se armāñ liye hue

ab vo junūñ rahā hai na vo mausam-e-bahār

baiThā huuñ apnā chāk-e-girebāñ siye hue

ab apne apne ḳhuuñ kī amānat hai aur ham

aur in amānatoñ kī hifāzat ke ḳhvāb haiñ

āñkhoñ meñ koī pyaas ho dil meñ koī taḌap

phaile hue ufuq se ufuq tak sarāb haiñ

kis ko ḳhabar thī lamha ik aisā bhī aa.egā

maazī tamām phir simaT aa.egā haal meñ

mahsūs ho rahā hai ki guzrā nahīñ hai vaqt

ik lamha baT gayā thā faqat maah o saal maiñ

tum bhī vahī ho maiñ bhī vahī vaqt bhī vahī

haañ ik bujhī bujhī sī chamak chashm-e-nam meñ hai

ye lamha jis ke sehr meñ kho.e hue haiñ ham

kitnī masarratoñ kā surūr is ke ġham meñ hai

muddat ke baad tum se mila hun to ye khula

ye waqt aur fasla dhoka nazar ka tha

chehre pe umr bhar ki masafat raqam sahi

dil ke liye tamam safar lamha bhar ka tha

kaisi ajib saat-e-didar hai ki hum

phir yun mile ki jaise kabhi dur hi na the

aankhon mein kam-sini ke wo sab KHwab jag uThe

jin mein nigah o dil kabhi majbur hi na the

masum kis qadar thin wo be-nam chahaten

bachpan se ham-kanar tha ahd-e-shabab bhi

yun aatish-e-badan mein thi shabnam ghuli hui

mahtab se ziyaada na tha aaftab bhi

phir wo hawa chali ki sabhi kuchh bikhar gaya

wo mahfilen wo dost wo gul-rang qahqahe

ab raqs-e-gard-baad ki surat hai zindagi

ye waqt ka azab kahan tak koi sahe

ab tum milin to kitne hi gham hain tumhaare sath

patthar ki tarah tum ne gizari hai zindagi

kitna lahu jalaya to ye phul muskurae

kis kis jatan se tum ne sanwari hai zindagi

main ne bhi ek johd-e-musalsal mein kaT di

wo umr thi jo phul se arman liye hue

ab wo junun raha hai na wo mausam-e-bahaar

baiTha hun apna chaak-e-gireban siye hue

ab apne apne KHun ki amanat hai aur hum

aur in amanaton ki hifazat ke KHwab hain

aankhon mein koi pyas ho dil mein koi taDap

phaile hue ufuq se ufuq tak sarab hain

kis ko KHabar thi lamha ek aisa bhi aaega

mazi tamam phir simaT aaega haal mein

mahsus ho raha hai ki guzra nahin hai waqt

ek lamha baT gaya tha faqat mah o sal main

tum bhi wahi ho main bhi wahi waqt bhi wahi

han ek bujhi bujhi si chamak chashm-e-nam mein hai

ye lamha jis ke sehr mein khoe hue hain hum

kitni masarraton ka surur is ke gham mein hai