muflisi

jab aadmī ke haal pe aatī hai muflisī

kis kis tarah se us ko satātī hai muflisī

pyāsā tamām roz biThātī hai muflisī

bhūkā tamām raat sulātī hai muflisī

ye dukh vo jaane jis pe ki aatī hai muflisī

kahiye to ab hakīm kī sab se baḌī hai shaañ

ta.azīm jis kī karte haiñ to ab aur ḳhaañ

muflis hue to hazrat-e-luqmāñ kiyā hai yaañ

iisā bhī ho to koī nahīñ pūchhtā miyāñ

hikmat hakīm kī bhī Dubātī hai muflisī

jo ahl-e-fazl aalim o fāzil kahāte haiñ

muflis hue to kalma talak bhuul jaate haiñ

vo jo ġharīb-ġhurabā ke laḌke paḌhāte haiñ

un kī to umr bhar nahīñ jaatī hai muflisī

muflis kare jo aan ke mahfil ke biich haal

sab jāneñ roTiyoñ kā ye Daalā hai is ne jaal

gir gir paḌe to koī na liye use sambhāl

muflis meñ hoveñ laakh agar ilm aur kamāl

sab ḳhaak bech aa ke milātī hai muflisī

jab roTiyoñ ke baTne kā aa kar paḌe shumār

muflis ko deveñ ek tavañgar ko chaar chaar

gar aur māñge vo to use jhiḌkeñ baar baar

muflis kā haal aah bayāñ kyā karūñ maiñ yaar

muflis ko is jagah bhī chabātī hai muflisī

muflis kī kuchh nazar nahīñ rahtī hai aan par

detā hai apnī jaan vo ek ek naan par

har aan TuuT paḌtā hai roTī ke ḳhvān par

jis tarah kutte laḌte haiñ ik ustuḳhvān par

vaisā hī muflisoñ ko laḌātī hai muflisī

kartā nahīñ hayā se jo koī vo kaam aah

muflis kare hai us ke ta.iiñ insirām aah

samjhe na kuchh halāl na jaane harām aah

kahte haiñ jis ko sharm-o-hayā nañg-o-nām aah

vo sab hayā-o-sharm uḌātī hai muflisī

ye muflisī vo shai hai ki jis ghar meñ bhar ga.ī

phir jitne ghar the sab meñ usī ghar ke dar ga.ī

zan bachche rote haiñ goyā naanī guzar ga.ī

ham-sāya pūchhte haiñ ki kyā daadī mar ga.ī

bin murde ghar meñ shor machātī hai muflisī

lāzim hai gar ġhamī meñ koī shor-ġhul machā.e

muflis baġhair ġham ke hī kartā hai haa.e haa.e

mar jaave gar koī to kahāñ se use uThā.e

is muflisī kī ḳhvāriyāñ kyā kyā kahūñ maiñ haa.e

murde ko be kafan ke gaḌātī hai muflisī

kyā kyā muflisī kī kahūñ ḳhvārī phakaḌiyāñ

jhāḌū baġhair ghar meñ bikhartī haiñ jhakaḌiyāñ

kone meñ jaale lapTe haiñ chhappar meñ makaḌiyāñ

paisā na hove jin ke jalāne ko lakḌiyāñ

dariyā meñ un ke murde bahātī hai muflisī

biibī kī nath na laḌkoñ ke hāthoñ kaḌe rahe

kapḌe miyāñ ke baniye ke ghar meñ paḌe rahe

jab kaḌiyāñ bik ga.iiñ to khañDar meñ paḌe rahe

zanjīr ne kivāḌ na patthar gaḌe rahe

āḳhir ko iiñT iiñT khudātī hai muflisī

naqqāsh par bhī zor jab aa muflisī kare

sab rañg dam meñ kar de musavvir ke kirkire

sūrat bhī us kī dekh ke muñh khiñch rahe pare

tasvīr aur naqsh meñ kyā rañg vo bhare

us ke to muñh kā rañg uḌātī hai muflisī

jab ḳhūb-rū pe aan ke paḌtā hai din siyāh

phirtā hai bose detā hai har ik ko ḳhvāh-maḳhvāh

hargiz kisī ke dil ko nahīñ hotī us kī chaah

gar husn ho hazār ruupe kā to us ko aah

kyā kauḌiyoñ ke mol bikātī hai muflisī

us ḳhūb-rū ko kaun de ab daam aur diram

jo kauḌī kauḌī bose ko raazī ho dam-ba-dam

Topī purānī do to vo jaane kulāh-e-jism

kyūñkar na jī ko us chaman-e-husn ke ho ġham

jis kī bahār muft luTātī hai muflisī

āshiq ke haal par bhī jab aa muflisī paḌe

ma.ashūq apne paas na de us ko baiThne

aave jo raat ko to nikāle vahīñ use

is Dar se ya.anī raat o dhannā kahīñ na de

tohmat ye āshiqoñ ko lagātī hai muflisī

kaise hī dhūm-dhām kī ranDī ho ḳhush-jamāl

jab muflisī ho kaan paḌe sar pe us ke jaal

dete haiñ us ke naach ko ThaTThe ke biich Daal

nāche hai vo to farsh ke uupar qadam sambhāl

aur us ko uñgliyoñ pe nachātī hai muflisī

us kā to dil Thikāne nahīñ bhaav kyā batā.e

jab ho phaTā dupaTTa to kaahe se muñh chhupā.e

le shaam se vo sub.h talak go ki nāche gaa.e

auroñ ko aaTh saat to vo do Take hī paa.e

is laaj se ise bhī lajātī hai muflisī

jis kasbī ranDī kā ho halākat se dil hazīñ

rakhtā hai us ko jab koī aa kar tamāsh-bīñ

ik paun paise tak bhī vo kartī nahīñ nahīñ

ye dukh usī se pūchhiye ab aah jis ke ta.iiñ

sohbat meñ saarī raat jagātī hai muflisī

vo to ye samjhe dil meñ ki Dhelā jo pā.ūñgī

damḌī ke paan damḌī ke missī mañgā.ūñgī

baaqī rahī chhadām so paanī bharā.ūñgī

phir dil meñ sochtī hai ki kyā ḳhaak khā.ūñgī

āḳhir chabīnā us kā bhunātī hai muflisī

jab muflisī se hove kalāvant kā dil udaas

phirtā hai le tambūre ko har ghar ke ās-pās

ik paav ser aane kī dil meñ lagā ke aas

gorī kā vaqt hove to gaatā hai vo babhās

yaañ tak havās us ke uḌātī hai muflisī

muflis biyāh beTī kā kartā hai bol bol

paisā kahāñ jo jā ke vo laave jahez mol

jorū kā vo galā ki phūTā ho jaise Dhol

ghar kī halāl-ḳhorī talak kartī hai ThiThol

haibat tamām us kī uThātī hai muflisī

beTe kā biyāh ho to na byāhī na sāthī hai

ne raushnī na baaje kī āvāz aatī hai

maañ pīchhe ek mailī chadar oḌhe jaatī hai

beTā banā hai dūlhā to baavā barātī hai

muflis kī ye barāt chaḌhātī hai muflisī

gar byaah kar chalā hai sahar ko to ye balā

shahdār naanā hījḌā aur bhaaT muñDchaḌā

khīñche hue use chale jaate haiñ jā-ba-jā

vo aage aage laḌtā huā jaatā hai chalā

aur pīchhe TapḌiyoñ ko bajātī hai muflisī

darvāze par zanāne bajāte haiñ tāliyāñ

aur ghar meñ baiThī Domnī detī haiñ gāliyāñ

mālan gale kī haar ho dauḌī le Dāliyāñ

saqqā khaḌā sunātā hai bāteñ razāliyāñ

ye ḳhvārī ye ḳharābī dikhātī hai muflisī

koī shuum be-hayā koī bolā nikhaTTū hai

beTī ne jaanā baap to merā nikhaTTū hai

beTe pukārte haiñ ki baabā nikhaTTū hai

biibī ye dil maiñ kahtī hai achchhā nikhaTTū hai

āḳhir nikhaTTū naam dharātī hai muflisī

muflis kā dard dil meñ koī Thāntā nahīñ

muflis kī baat ko bhī koī māntā nahīñ

zaat aur hasab-nasab ko koī jāntā nahīñ

sūrat bhī us kī phir koī pahchāntā nahīñ

yaañ tak nazar se us ko girātī hai muflisī

jis vaqt muflisī se ye aa kar huā tabāh

phir koī is ke haal pa kartā nahīñ nigāh

dālīdarī kahe koī Thahrā de rū-siyāh

jo bāteñ umr bhar na sunī hoveñ us ne aah

vo bāteñ us ko aa ke sunātī haiñ muflisī

chūlhā tavānā paanī ke maTke meñ aabī hai

piine ko kuchh na khāne ko aur ne rakābī hai

muflis ke saath sab ke ta.iiñ be-hijābī hai

muflis kī jorū sach hai ki yaañ sab kī bhābī hai

izzat sab us ke dil kī gañvātī hai muflisī

kaisā hī aadmī ho par iflās ke tufail

koī gadhā kahe use Thahrā de koī bail

kapḌe phaTe tamām baḌhe baal phail phail

muñh ḳhushk daañt zard badan par jamā hai mail

sab shakl qaidiyoñ kī banātī hai muflisī

har aan dostoñ kī mohabbat ghaTātī hai

jo āshnā haiñ un kī to ulfat ghaTātī hai

apne kī mehr ġhair kī chāhat ghaTātī hai

sharm-o-hayā o izzat-o-hurmat ghaTātī hai

haañ nāḳhun aur baal baḌhātī hai muflisī

jab muflisī huī to sharāfat kahāñ rahī

vo qadr zaat kī vo najābat kahāñ rahī

kapḌe phaTe to logoñ meñ izzat kahāñ rahī

ta.azīm aur tavāzo.a kī bābat kahāñ rahī

majlis kī jūtiyoñ pe biThātī hai muflisī

muflis kisī kā laḌkā jo le pyaar se uThā

baap us kā dekhe haath kā aur paañv kā kaḌā

kahtā hai koī juutī na leve kahīñ churā

naT-khaT uchakkā chor daġhābāz gaTh-kaTā

sau sau tarah ke aib lagātī hai muflisī

rakhtī nahīñ kisī kī ye ġhairat kī aan ko

sab ḳhaak meñ milātī hai hurmat kī shaan ko

sau mehnatoñ meñ us kī khapātī hai jaan ko

chorī pe aa ke Daale hī muflis ke dhyān ko

āḳhir nadān bhiik mañgātī hai muflisī

duniyā meñ le ke shaah se ai yaar tā-faqīr

ḳhāliq na muflisī meñ kisī ko kare asiir

ashrāf ko banātī hai ik aan meñ faqīr

kyā kyā maiñ muflisī kī ḳharābī kahūñ 'nazīr'

vo jaane jis ke dil ko jalātī hai muflisī

jab aadmi ke haal pe aati hai muflisi

kis kis tarah se us ko satati hai muflisi

pyasa tamam roz biThati hai muflisi

bhuka tamam raat sulati hai muflisi

ye dukh wo jaane jis pe ki aati hai muflisi

kahiye to ab hakim ki sab se baDi hai shan

tazim jis ki karte hain to ab aur KHan

muflis hue to hazrat-e-luqman kiya hai yan

isa bhi ho to koi nahin puchhta miyan

hikmat hakim ki bhi Dubaati hai muflisi

jo ahl-e-fazl aalim o fazil kahate hain

muflis hue to kalma talak bhul jate hain

wo jo gharib-ghuraba ke laDke paDhate hain

un ki to umr bhar nahin jati hai muflisi

muflis kare jo aan ke mahfil ke bich haal

sab jaanen roTiyon ka ye Dala hai is ne jal

gir gir paDe to koi na liye use sambhaal

muflis mein howen lakh agar ilm aur kamal

sab KHak bech aa ke milati hai muflisi

jab roTiyon ke baTne ka aa kar paDe shumar

muflis ko dewen ek tawangar ko chaar chaar

gar aur mange wo to use jhiDken bar bar

muflis ka haal aah bayan kya karun main yar

muflis ko is jagah bhi chabaati hai muflisi

muflis ki kuchh nazar nahin rahti hai aan par

deta hai apni jaan wo ek ek nan par

har aan TuT paDta hai roTi ke KHwan par

jis tarah kutte laDte hain ek ustuKHwan par

waisa hi muflison ko laDati hai muflisi

karta nahin haya se jo koi wo kaam aah

muflis kare hai us ke tain insiram aah

samjhe na kuchh halal na jaane haram aah

kahte hain jis ko sharm-o-haya nang-o-nam aah

wo sab haya-o-sharm uDati hai muflisi

ye muflisi wo shai hai ki jis ghar mein bhar gai

phir jitne ghar the sab mein usi ghar ke dar gai

zan bachche rote hain goya nani guzar gai

ham-saya puchhte hain ki kya dadi mar gai

bin murde ghar mein shor machati hai muflisi

lazim hai gar ghami mein koi shor-ghul machae

muflis baghair gham ke hi karta hai hae hae

mar jawe gar koi to kahan se use uThae

is muflisi ki KHwariyan kya kya kahun main hae

murde ko be kafan ke gaDati hai muflisi

kya kya muflisi ki kahun KHwari phakaDiyan

jhaDu baghair ghar mein bikharti hain jhakaDiyan

kone mein jale lapTe hain chhappar mein makaDiyan

paisa na howe jin ke jalane ko lakDiyan

dariya mein un ke murde bahati hai muflisi

bibi ki nath na laDkon ke hathon kaDe rahe

kapDe miyan ke baniye ke ghar mein paDe rahe

jab kaDiyan bik gain to khanDar mein paDe rahe

zanjir ne kiwaD na patthar gaDe rahe

aaKHir ko inT inT khudati hai muflisi

naqqash par bhi zor jab aa muflisi kare

sab rang dam mein kar de musawwir ke kirkire

surat bhi us ki dekh ke munh khinch rahe pare

taswir aur naqsh mein kya rang wo bhare

us ke to munh ka rang uDati hai muflisi

jab KHub-ru pe aan ke paDta hai din siyah

phirta hai bose deta hai har ek ko KHwah-maKHwah

hargiz kisi ke dil ko nahin hoti us ki chah

gar husn ho hazar rupe ka to us ko aah

kya kauDiyon ke mol bikati hai muflisi

us KHub-ru ko kaun de ab dam aur diram

jo kauDi kauDi bose ko raazi ho dam-ba-dam

Topi purani do to wo jaane kulah-e-jism

kyunkar na ji ko us chaman-e-husn ke ho gham

jis ki bahaar muft luTati hai muflisi

aashiq ke haal par bhi jab aa muflisi paDe

mashuq apne pas na de us ko baiThne

aawe jo raat ko to nikale wahin use

is Dar se yani raat o dhanna kahin na de

tohmat ye aashiqon ko lagati hai muflisi

kaise hi dhum-dham ki ranDi ho KHush-jamal

jab muflisi ho kan paDe sar pe us ke jal

dete hain us ke nach ko ThaTThe ke bich Dal

nache hai wo to farsh ke upar qadam sambhaal

aur us ko ungliyon pe nachati hai muflisi

us ka to dil Thikane nahin bhaw kya batae

jab ho phaTa dupaTTa to kahe se munh chhupae

le sham se wo subh talak go ki nache gae

auron ko aaTh sat to wo do Take hi pae

is laj se ise bhi lajati hai muflisi

jis kasbi ranDi ka ho halakat se dil hazin

rakhta hai us ko jab koi aa kar tamash-bin

ek paun paise tak bhi wo karti nahin nahin

ye dukh usi se puchhiye ab aah jis ke tain

sohbat mein sari raat jagati hai muflisi

wo to ye samjhe dil mein ki Dhela jo paungi

damDi ke pan damDi ke missi mangaungi

baqi rahi chhadam so pani bharaungi

phir dil mein sochti hai ki kya KHak khaungi

aaKHir chabina us ka bhunati hai muflisi

jab muflisi se howe kalawant ka dil udas

phirta hai le tambure ko har ghar ke aas-pas

ek paw ser aane ki dil mein laga ke aas

gori ka waqt howe to gata hai wo babhas

yan tak hawas us ke uDati hai muflisi

muflis biyah beTi ka karta hai bol bol

paisa kahan jo ja ke wo lawe jahez mol

joru ka wo gala ki phuTa ho jaise Dhol

ghar ki halal-KHori talak karti hai ThiThol

haibat tamam us ki uThati hai muflisi

beTe ka biyah ho to na byahi na sathi hai

ne raushni na baje ki aawaz aati hai

man pichhe ek maili chadar oDhe jati hai

beTa bana hai dulha to bawa baraati hai

muflis ki ye baraat chaDhati hai muflisi

gar byah kar chala hai sahar ko to ye bala

shahdar nana hijDa aur bhaT munDchaDa

khinche hue use chale jate hain ja-ba-ja

wo aage aage laDta hua jata hai chala

aur pichhe TapDiyon ko bajati hai muflisi

darwaze par zanane bajate hain taliyan

aur ghar mein baiThi Domni deti hain galiyan

malan gale ki haar ho dauDi le Daliyan

saqqa khaDa sunata hai baaten razaliyan

ye KHwari ye KHarabi dikhati hai muflisi

koi shum be-haya koi bola nikhaTTu hai

beTi ne jaana bap to mera nikhaTTu hai

beTe pukarte hain ki baba nikhaTTu hai

bibi ye dil main kahti hai achchha nikhaTTu hai

aaKHir nikhaTTu nam dharaati hai muflisi

muflis ka dard dil mein koi Thanta nahin

muflis ki baat ko bhi koi manta nahin

zat aur hasab-nasab ko koi jaanta nahin

surat bhi us ki phir koi pahchanta nahin

yan tak nazar se us ko giraati hai muflisi

jis waqt muflisi se ye aa kar hua tabah

phir koi is ke haal pa karta nahin nigah

dalidari kahe koi Thahra de ru-siyah

jo baaten umr bhar na suni howen us ne aah

wo baaten us ko aa ke sunati hain muflisi

chulha tawana pani ke maTke mein aabi hai

pine ko kuchh na khane ko aur ne rakabi hai

muflis ke sath sab ke tain be-hijabi hai

muflis ki joru sach hai ki yan sab ki bhabi hai

izzat sab us ke dil ki ganwati hai muflisi

kaisa hi aadmi ho par iflas ke tufail

koi gadha kahe use Thahra de koi bail

kapDe phaTe tamam baDhe baal phail phail

munh KHushk dant zard badan par jama hai mail

sab shakl qaidiyon ki banati hai muflisi

har aan doston ki mohabbat ghaTati hai

jo aashna hain un ki to ulfat ghaTati hai

apne ki mehr ghair ki chahat ghaTati hai

sharm-o-haya o izzat-o-hurmat ghaTati hai

han naKHun aur baal baDhati hai muflisi

jab muflisi hui to sharafat kahan rahi

wo qadr zat ki wo najabat kahan rahi

kapDe phaTe to logon mein izzat kahan rahi

tazim aur tawazoa ki babat kahan rahi

majlis ki jutiyon pe biThati hai muflisi

muflis kisi ka laDka jo le pyar se uTha

bap us ka dekhe hath ka aur panw ka kaDa

kahta hai koi juti na lewe kahin chura

naT-khaT uchakka chor daghabaz gaTh-kaTa

sau sau tarah ke aib lagati hai muflisi

rakhti nahin kisi ki ye ghairat ki aan ko

sab KHak mein milati hai hurmat ki shan ko

sau mehnaton mein us ki khapati hai jaan ko

chori pe aa ke Dale hi muflis ke dhyan ko

aaKHir nadan bhik mangati hai muflisi

duniya mein le ke shah se ai yar ta-faqir

KHaliq na muflisi mein kisi ko kare asir

ashraf ko banati hai ek aan mein faqir

kya kya main muflisi ki KHarabi kahun 'nazir'

wo jaane jis ke dil ko jalati hai muflisi