muflison ka qaumi tarana

yahī mirī ḳhvāb-gāh-e-ishrat yahī hai merā nigār-ḳhāna

dhueñ kī rangīn badliyoñ meñ pakā rahī hai jahāñ vo khānā

yahīñ añdheroñ se mil ke ham chāñdnī ke chhakke chhuḌā rahe haiñ

yahīñ hamārā sila muqarrar huā hai adbār-e-jāvedāna

yahīñ use giilī lakḌiyoñ ne ḳhushī ke aañsū bahāte dekhā

yahīñ use raakh kī tahoñ ne banā diyā ġhair shā.irāna

yahīñ mirī saḳht-jān ġhairat ye bārhā sun chukī hai ab tak

abe tirī muflisī ke charche sune the maiñ ne to ġhā.ebāna

yahīñ vo jān-e-vafā mirī aarzū kī rangīniyoñ kī ḳhātir

chhiḌak ke bāloñ meñ itr-e-andesha kartī rahtī hai in meñ shāna

agar nahūsat kī jaan hai vo to banda īmān-e-muflisī hai

isī liye ek dūsre se hameñ mohabbat hai vālihāna

ilāhī terī ināyatoñ kā ye ek adnā sā hai karishma

hamāre iflās-e-be-karāñ kā jo aaj hai mo'tarif zamāna

vo us kā jaaḌe kī sard rātoñ meñ mujh se īñdhan kī baat karnā

ki jaise ye chiiz māvarā.ī ho yā alif-lailvī fasāna

tavīl fāqoñ ke ba.ad donoñ kā piich pī kar vo jhuum uThnā

vo us kī sharmīlī sī nigāheñ vo mere jazbāt-e-āshiqāna

ḳhushī meñ saarī ḳhudā.ī meñ half-day manāyā gayā thā us din

vajūd meñ aa gayā thā jis din hamārī ulfat kā shāḳhsāna

yahi meri KHwab-gah-e-ishrat yahi hai mera nigar-KHana

dhuen ki rangin badliyon mein paka rahi hai jahan wo khana

yahin andheron se mil ke hum chandni ke chhakke chhuDa rahe hain

yahin hamara sila muqarrar hua hai adbar-e-jawedana

yahin use gili lakDiyon ne KHushi ke aansu bahate dekha

yahin use rakh ki tahon ne bana diya ghair shairana

yahin meri saKHt-jaan ghairat ye barha sun chuki hai ab tak

abe teri muflisi ke charche sune the main ne to ghaebana

yahin wo jaan-e-wafa meri aarzu ki ranginiyon ki KHatir

chhiDak ke baalon mein itr-e-andesha karti rahti hai in mein shana

agar nahusat ki jaan hai wo to banda iman-e-muflisi hai

isi liye ek dusre se hamein mohabbat hai walihana

ilahi teri inayaton ka ye ek adna sa hai karishma

hamare iflas-e-be-karan ka jo aaj hai mo'tarif zamana

wo us ka jaDe ki sard raaton mein mujh se indhan ki baat karna

ki jaise ye chiz mawarai ho ya alif-lailwi fasana

tawil faqon ke baad donon ka pich pi kar wo jhum uThna

wo us ki sharmili si nigahen wo mere jazbaat-e-ashiqana

KHushi mein sari KHudai mein half-day manaya gaya tha us din

wajud mein aa gaya tha jis din hamari ulfat ka shaKHsana