mujassama

ai siyah-fām hasīna tirā 'uryāñ paikar

kitnī pathrā.ī huī āñkhoñ meñ ġhaltīda hai

jaane kis daur-e-alam-nāk se le kar ab tak

tū kaḌe vaqt ke zindānoñ meñ ḳhvābīda hai

tere sab rang hayūle ke ye be-jān nuqūsh

jaise marbūt ḳhayālāt ke tāne-bāne

ye tirī sāñvlī rangat ye pareshān ḳhutūt

bārhā jaise miTāyā ho inheñ duniyā ne

resha-e-sañg se khīñchī huī zulfeñ jaise

rāste sīna-e-kohsār pe bal khāte haiñ

abrūoñ kī jhukī mehrāboñ meñ jāmid palkeñ

jis tarah tiir kamānoñ meñ ulajh jaate haiñ

munjamid hoñToñ pe sannāToñ kā sangīn tilism

jaise nāyāb ḳhazānoñ pe kaḌe pahre hoñ

tund jazbāt se bharpūr barahna siina

jaise sustāne ko tūfān zarā Thahre hoñ

jaise yūnān ke maġhrūr ḳhudā-vandoñ ne

regzārān-e-habsh kī kisī shahzādī ko

tishna rūhoñ ke havasnāk ta.ayyush ke liye

hajla-e-sañg meñ pāband banā rakkhā ho

ai siyah-fam hasina tera 'uryan paikar

kitni pathrai hui aankhon mein ghaltida hai

jaane kis daur-e-alam-nak se le kar ab tak

tu kaDe waqt ke zindanon mein KHwabida hai

tere sab rang hayule ke ye be-jaan nuqush

jaise marbut KHayalat ke tane-bane

ye teri sanwli rangat ye pareshan KHutut

barha jaise miTaya ho inhen duniya ne

resha-e-sang se khinchi hui zulfen jaise

raste sina-e-kohsar pe bal khate hain

abruon ki jhuki mehrabon mein jamid palken

jis tarah tir kamanon mein ulajh jate hain

munjamid honTon pe sannaTon ka sangin tilism

jaise nayab KHazanon pe kaDe pahre hon

tund jazbaat se bharpur barahna sina

jaise sustane ko tufan zara Thahre hon

jaise yunan ke maghrur KHuda-wandon ne

regzaran-e-habsh ki kisi shahzadi ko

tishna ruhon ke hawasnak tayyush ke liye

hajla-e-sang mein paband bana rakkha ho