mujhe aawaz mat dena

nihāyat sāf-goī se mujhe us ne batāyā hai

mujhe āvāz mat denā

kabhī pur-nūr sub.hoñ meñ

kabhī rangīn shāmoñ meñ

kabhī ḳhvābīda ḳhvāboñ meñ

mujhe āvāz mat denā

ki saut-o-harf ke jitne ta.alluq tum se qaa.em the

vo sab nā-mo'tabar Thahre

mohabbat kī junūñ-ḳhezī to bas ik aarzī shai thī

qabā-e-shauq ke sab rang kachche the

so maiñ ne ab dupaTTe ke kisī pahlū se

koī bhī girah baaqī nahīñ rakkhī

koī ḳhvāhish koī chāhat koī hasrat nahīñ rakhī

jo koī kāñch kā TukḌā

kisī vaade kā bosīda tayaqqun

yā koī ummīd kā ik pal

tumhāre paas hai

to lauTā do

mujhe ab yaad aayā hai

ki āḳhir ko ye honā thā

yahī āḳhir meñ honā hai

nihayat saf-goi se mujhe us ne bataya hai

mujhe aawaz mat dena

kabhi pur-nur subhon mein

kabhi rangin shamon mein

kabhi KHwabida KHwabon mein

mujhe aawaz mat dena

ki saut-o-harf ke jitne talluq tum se qaem the

wo sab na-mo'tabar Thahre

mohabbat ki junun-KHezi to bas ek aarzi shai thi

qaba-e-shauq ke sab rang kachche the

so main ne ab dupaTTe ke kisi pahlu se

koi bhi girah baqi nahin rakkhi

koi KHwahish koi chahat koi hasrat nahin rakhi

jo koi kanch ka TukDa

kisi wade ka bosida tayaqqun

ya koi ummid ka ek pal

tumhaare pas hai

to lauTa do

mujhe ab yaad aaya hai

ki aaKHir ko ye hona tha

yahi aaKHir mein hona hai