mujhe bata to sahi

mujhe batā to sahī ai habīb-e-kam-umrī

vahī haiñ lab vahī guftār aur vahī andāz

pas-e-vajūd vo kyā thā jo ab nahīñ hotā

mirī nazar meñ koī aisī raushnī thī bhalā

jo bijliyoñ sī utar kar tire sarāpe meñ

tujhe hujūm-e-dilārām se sivā kartī

vahī adā vahī andāz ḳhadd-o-ḳhāl magar

lagāv dil kā yūñhī be-sabab nahīñ hotā

ab us maqām pe hai zindagī jahāñ par ishq

haqīqatoñ se ka.ī saal iktisāb ke baa'd

badal chukā baḌī muddat se husn kā me.aar

mazīd ye ki chhalaktā vo dil kā paimāna

guzarte vaqt kī ThanDak se bhar gayā jaise

nazar pe ḳhvāb se rangoñ kā ek parda thā

vo ḳhvāb-rang sā parda utar gayā jaise

ab ai habīb tirī chashm-e-sahar-āgīñ meñ

sivā.e aks-e-guzishta ke kuchh nahīñ miltā

vo imtiyāz tirā kho gayā hujūm meñ phir

har ek rang tire ruḳh pe ab nahīñ khiltā

isī liye tujhe dekhā to dil ne sochā hai

vo bholpan thā mirā yā mirī himāqat thī

mujhe batā to sahī ai habīb-e-kam-umrī

mujhe bata to sahi ai habib-e-kam-umri

wahi hain lab wahi guftar aur wahi andaz

pas-e-wajud wo kya tha jo ab nahin hota

meri nazar mein koi aisi raushni thi bhala

jo bijliyon si utar kar tere sarape mein

tujhe hujum-e-dilaram se siwa karti

wahi ada wahi andaz KHadd-o-KHal magar

lagaw dil ka yunhi be-sabab nahin hota

ab us maqam pe hai zindagi jahan par ishq

haqiqaton se kai sal iktisab ke ba'd

badal chuka baDi muddat se husn ka mear

mazid ye ki chhalakta wo dil ka paimana

guzarte waqt ki ThanDak se bhar gaya jaise

nazar pe KHwab se rangon ka ek parda tha

wo KHwab-rang sa parda utar gaya jaise

ab ai habib teri chashm-e-sahar-agin mein

siwae aks-e-guzishta ke kuchh nahin milta

wo imtiyaz tera kho gaya hujum mein phir

har ek rang tere ruKH pe ab nahin khilta

isi liye tujhe dekha to dil ne socha hai

wo bholpan tha mera ya meri himaqat thi

mujhe bata to sahi ai habib-e-kam-umri