mujhe juzdan se bahar nikalo

mujhe juzdān meñ tum ne lapeTā

phir us ke baa'd tāqoñ par sajāyā

mirī āyāt ke ta.avīz kar ke

tumhī ne mujh ko jismoñ par sajāyā

kabhī sach qatl kar dene kī ḳhātir

saroñ par apne jhūToñ ne uThāyā

mujhe samjhe binā paḌhte rahe tum

mirī tauhīn yuuñ karte rahe tum

mire alfāz ko tasvīr kar ke

sajāyā ghar kī dīvāroñ ko tum ne

muballiġh ne ġhalat tashrīh kar ke

mire paiġhām kī tauhīn kī hai

maiñ rakkhā jāhiloñ kī rehl par huuñ

tabhī to aisī hālat diin kī hai

mohabbat amn kā paiġhām huuñ maiñ

agar samjho to ik in.aam huuñ maiñ

ḳhudā ke vāste ḳhud ko sañbhālo

mujhe juzdān se bāhar nikālo

mujhe juzdan mein tum ne lapeTa

phir us ke ba'd taqon par sajaya

meri aayat ke tawiz kar ke

tumhi ne mujh ko jismon par sajaya

kabhi sach qatl kar dene ki KHatir

saron par apne jhuTon ne uThaya

mujhe samjhe bina paDhte rahe tum

meri tauhin yun karte rahe tum

mere alfaz ko taswir kar ke

sajaya ghar ki diwaron ko tum ne

muballigh ne ghalat tashrih kar ke

mere paigham ki tauhin ki hai

main rakkha jahilon ki rehl par hun

tabhi to aisi haalat din ki hai

mohabbat amn ka paigham hun main

agar samjho to ek inam hun main

KHuda ke waste KHud ko sanbhaalo

mujhe juzdan se bahar nikalo