mujhe le chal

mirī 'salmā' mujhe le chal tū un rañgīñ bahāroñ meñ!

jahāñ rañgīñ bahishteñ kheltī haiñ sabza-zāroñ meñ!

jahāñ hūroñ kī zulfeñ jhūmtī haiñ shāḳh-sāroñ meñ

jahāñ pariyoñ ke naġhme gūñjte haiñ kohsāroñ meñ

javānī kī bahāreñ tairtī haiñ ābshāroñ meñ

mirī 'salmā'! mujhe le chal tū un rañgīñ bahāroñ meñ

vo mastāna bahāreñ jin pe qurbāñ arz-e-jannat hai

jahāñ har zarra ik gahvāra-e-mauj-e-latāfat hai

jahāñ rañgat hī rañgat hai jahāñ nik.hat hī nik.hat hai

mohabbat hukmarāñ hai jin ke pākīza dayāroñ meñ!

mirī 'salmā' mujhe le chal tū un rañgīñ bahāroñ meñ!

vo doshīza fazā.eñ jannatoñ kā hai gumāñ jin par

chhiḌaktā hai mai-e-tasnīm-o-kausar āsmāñ jin par

luTātī hai sahāb-e-husn-o-tal.at kahkashāñ jin par

surūr o nuur o nik.hat baste haiñ jin ke sitāroñ meñ

mirī 'salmā'! mujhe le chal tū un rañgīñ bahāroñ meñ!

jahāñ shaam o sahar niilī ghaTā.eñ ghir ke aatī haiñ!

ufuq kī god meñ nīlam kī pariyāñ muskurātī haiñ!

fazāoñ meñ bahāreñ hī bahāreñ lahlahātī haiñ

jahāñ fitrat machaltī hai lahakte abr-pāroñ meñ!

mirī 'salmā'! mujhe le chal tū un rañgīñ bahāroñ meñ!

jahāñ chāroñ taraf bāġh-o-gulistāñ lahlahāte haiñ

shagufta vādiyoñ meñ jannatoñ ke ḳhvāb aate haiñ

jahāñ ma.asūm taa.ir ishq ke naġhme sunāte haiñ

aur un kā lahn-e-shīrīñ gūñjtā hai kohsāroñ meñ!

mirī 'salmā'! mujhe le chal tū un rañgīñ bahāroñ meñ!

hukūmat hai jahāñ sidq-o-safā o mehr-o-ulfat kī

nashāt-o-aish-o-ishrat kī surūr-o-lutf-o-rāhat kī

nasīm o anjum o gul kī navā o nuur o nik.hat kii!

mohabbat maujzan hai jin ke doshīza nazāroñ meñ

mirī 'salmā'! mujhe le chal tū un rañgīñ nazāroñ meñ!

jahāñ ābād ye nāpāk shahristāñ nahīñ hote

fasādī fitna-parvar aur zalīl insāñ nahīñ hote

ye insāñ haañ ye haivāñ bad-tar az-shaitāñ nahīñ hote

fasād-o-shar jahāñ sote haiñ ḳhvāboñ ke mazāroñ meñ!

mirī 'salmā'! mujhe le chal tū un rañgīñ nazāroñ meñ!

bahishtoñ kī latāfat hai jahāñ kī zindagānī meñ

maza aatā hai kausar kā jahāñ ke saada paanī meñ

ḳhudā.ī husn uryāñ hai jahāñ kī naujavānī meñ!

sadāqat karvaTeñ letī hai sāz-e-dil ke tāroñ meñ

mirī 'salmā'! mujhe le chal tū un rañgīñ nazāroñ meñ!

''hayāt-e-dā.imī'' likkhā huā hai jin ke aivāñ par

iram-zār-e-abad hai sāya-zan jin ke ḳhayābāñ par

davāmiyyat ke jalve chhā rahe haiñ bāġh-o-bustāñ par

guzar mumkin nahīñ hai maut kā jin ke nazāroñ meñ

mirī 'salmā'! mujhe le chal tū un rañgīñ nazāroñ meñ

mohabbat meñ jo ho jaatā hai pā.inda nahīñ martā!

sadāqat jis ko kar detī hai tābinda nahīñ martā!

hai jis meñ ishq raqsāñ vo dil-e-zinda nahīñ martā!

nava-e-''lā-fanā'' hai ruuh ke ḳhāmosh tāroñ meñ

mirī 'salmā'! mujhe le chal to un rañgīñ nazāroñ meñ!

meri 'salma' mujhe le chal tu un rangin bahaaron mein!

jahan rangin bahishten khelti hain sabza-zaron mein!

jahan huron ki zulfen jhumti hain shaKH-saron mein

jahan pariyon ke naghme gunjte hain kohsaron mein

jawani ki bahaaren tairti hain aabshaaron mein

meri 'salma'! mujhe le chal tu un rangin bahaaron mein

wo mastana bahaaren jin pe qurban arz-e-jannat hai

jahan har zarra ek gahwara-e-mauj-e-latafat hai

jahan rangat hi rangat hai jahan nikhat hi nikhat hai

mohabbat hukmaran hai jin ke pakiza dayaron mein!

meri 'salma' mujhe le chal tu un rangin bahaaron mein!

wo doshiza fazaen jannaton ka hai guman jin par

chhiDakta hai mai-e-tasnim-o-kausar aasman jin par

luTati hai sahab-e-husn-o-talat kahkashan jin par

surur o nur o nikhat baste hain jin ke sitaron mein

meri 'salma'! mujhe le chal tu un rangin bahaaron mein!

jahan sham o sahar nili ghaTaen ghir ke aati hain!

ufuq ki god mein nilam ki pariyan muskuraati hain!

fazaon mein bahaaren hi bahaaren lahlahati hain

jahan fitrat machalti hai lahakte abr-paron mein!

meri 'salma'! mujhe le chal tu un rangin bahaaron mein!

jahan chaaron taraf bagh-o-gulistan lahlahate hain

shagufta wadiyon mein jannaton ke KHwab aate hain

jahan masum tair ishq ke naghme sunate hain

aur un ka lahn-e-shirin gunjta hai kohsaron mein!

meri 'salma'! mujhe le chal tu un rangin bahaaron mein!

hukumat hai jahan sidq-o-safa o mehr-o-ulfat ki

nashat-o-aish-o-ishrat ki surur-o-lutf-o-rahat ki

nasim o anjum o gul ki nawa o nur o nikhat ki!

mohabbat maujzan hai jin ke doshiza nazaron mein

meri 'salma'! mujhe le chal tu un rangin nazaron mein!

jahan aabaad ye napak shahristan nahin hote

fasadi fitna-parwar aur zalil insan nahin hote

ye insan han ye haiwan bad-tar az-shaitan nahin hote

fasad-o-shar jahan sote hain KHwabon ke mazaron mein!

meri 'salma'! mujhe le chal tu un rangin nazaron mein!

bahishton ki latafat hai jahan ki zindagani mein

maza aata hai kausar ka jahan ke sada pani mein

KHudai husn uryan hai jahan ki naujawani mein!

sadaqat karwaTen leti hai saz-e-dil ke taron mein

meri 'salma'! mujhe le chal tu un rangin nazaron mein!

hayat-e-daimi likkha hua hai jin ke aiwan par

iram-zar-e-abad hai saya-zan jin ke KHayaban par

dawamiyyat ke jalwe chha rahe hain bagh-o-bustan par

guzar mumkin nahin hai maut ka jin ke nazaron mein

meri 'salma'! mujhe le chal tu un rangin nazaron mein

mohabbat mein jo ho jata hai painda nahin marta!

sadaqat jis ko kar deti hai tabinda nahin marta!

hai jis mein ishq raqsan wo dil-e-zinda nahin marta!

nawa-e-la-fana hai ruh ke KHamosh taron mein

meri 'salma'! mujhe le chal to un rangin nazaron mein!